Былая палітзняволеная з Беларусі трапіла ў зборную Польшчы па футболе сярод эмігрантаў
Былая беларуская палітзняволеная Марыя Бабовіч увайшла ў склад зборнай Польшчы па футболе сярод эмігрантаў, якая 15 кастрычніка выступіла на міжнародным турніры Unity Euro Cup у Нідэрландах, піша Most.
Unity Euro Cup — футбольны турнір, арганізаваны сумесна УЕФА і Упраўленнем Вярхоўнага камісара ААН па справах бежанцаў (UNHCR). Яго мэта — інтэграцыя бежанцаў у мясцовыя супольнасці праз спорт. Гульні праходзяць у фармаце 7 на 7: кожная каманда складаецца з сямі бежанцаў і чатырох прадстаўнікоў краіны, якая іх прымае, пры гэтым у складзе павінна быць не менш за тры жанчыны.
У 2025 годзе турнір праходзіць з 14 па 16 кастрычніка ў Нідэрландах, у ім удзельнічаюць 18 каманд. У складзе зборнай Польшчы, акрамя палякаў, выступаюць прадстаўнікі Афганістана, Сірыі і Беларусі.
Каманда не здолела выйсці ў плэй-оф. Акрамя Марыі, за зборную Польшчы таксама гуляў адзін са стваральнікаў клуба «Пагоня» Антон Лагвінец.
Марыя Бабовіч займалася футболам на аматарскім узроўні яшчэ ў Беларусі, а пасля пераезду ў Польшчу аднавіла трэніроўкі.
«Ужо два гады я гуляю ў Etnoliga ў Польшчы, дзе выступаюць мігранты і мігранткі з розных краін свету. Чатыры месяцы таму даведалася пра турнір у Нідэрландах для мігрантаў, прайшла адбор і трапіла ў каманду. Два месяцы мы трэніраваліся — і адправіліся на спаборніцтвы», — расказвае Марыя.
Беларуска прызнаецца, што была ўражаная ўзроўнем арганізацыі і стаўленнем да ўдзельнікаў зборнай. Усім гульцам у Польшчы выдалі поўны камплект формы — як у нацыянальнай зборнай.
«Тое, што форму трэба вярнуць пасля турніру, мяне не хвалюе. Галоўнае — удалося выступіць на такім узроўні. Раней я нават марыць пра гэта не магла», — кажа Марыя.
Марыя Бабовіч была затрыманая 9 верасня 2020 года каля станцыі метро «Пушкінская» ў Мінску за надпіс на тратуары «Не забудзем». Спачатку супраць яе распачалі крымінальную справу па артыкуле 339 Крымінальнага кодэкса («Хуліганства, здзейсненае групай асобаў»). Праз некалькі дзён яе адпусцілі, але пазней зноў выклікалі ў міліцыю і азнаёмілі з пастановай па артыкуле 341.
Абвінавачанне пазней перакваліфікавалі на ч. 2 арт. 339 і ч. 2 арт. 218 КК («Наўмыснае знішчэнне альбо пашкоджанне маёмасці з буйной шкодай»), пасля чаго Марыю зноў затрымалі і пакінулі пад вартай у СІЗА Жодзіна да суда.
Суд Фрунзенскага раёна Мінска ў снежні 2020 года разглядаў справу разам з палітвязнем Максімам Паўлюшчыкам. Суддзя Аліна Касьянчык адмовілася ад абвінавачвання па ч. 2 арт. 218. У выніку Марыю 8 снежня 2020 года асудзілі на паўтары гады абмежавання волі без накіравання ў папраўчую ўстанову — з адбываннем пакарання дома («хатняя хімія»). Не адбыўшы гэтага тэрміну да канца, яна пакінула Беларусь.
«На жаль, свой унёсак у гэтую справу я пачала рабіць толькі з 2020 года, з 9 жніўня». Як беларуска крута змяніла сваё жыццё
«У суботу і нядзелю нельга выходзіць з дому». Як адбываюць хатнюю хімію асуджаныя за палітыку
Пяці фігурантам справы за надпіс «Не забудзем» пакінулі прысуды ў сіле. Яны паедуць на «хімію» і ў калонію
Хатняя хімія і рэальнае пакаранне: вынеслі прысуд за надпіс на месцы гібелі Тарайкоўскага на Пушкінскай
Праваабаронцы прызналі палітвязнямі Марыю Бабовіч і Дзяніса Граханава, якіх пераследуюць за надпіс «Не забудзем»
Каментары