Хунта М'янмы правяла рэйд у адным з найбуйнейшых скам-цэнтраў. Сотні яго жыхароў уцяклі ў Тайланд

Вайскоўцы пачалі наступ на сумна вядомы комплекс KK Park на мяжы з Тайландам у панядзелак, вызваліўшы больш за дзве тысячы чалавек і канфіскаваўшы дзясяткі спадарожнікавых тэрміналаў Starlink.

У пятніцу ўлады тайскай правінцыі Так паведамілі, што агулам мяжу перасеклі 1049 чалавек, сярод іх былі грамадзяне Кітая, Індыі, Пакістана, В'етнама, М'янмы, Тайланда і іншых краін.

Яны пераправіліся праз раку Маэй на лодках і былі накіраваны для праверкі ў бліжэйшы горад Мэсот, дзе ўлады стварылі аператыўны штаб.

Што вядома пра KK Park

KK Park — комплекс будынкаў, размешчаны на поўдзень ад памежнага горада М'явадзі ў штаце Карэн. Ён акружаны плотам з калючым дротам, на яго тэрыторыі знаходзяцца жылыя будынкі, крамы, рэстараны і бальніца. Комплекс ахоўваецца ўзброенымі людзьмі.

Першапачаткова ён задумваўся як памежны бізнэс-парк, аднак у апошнія гады стаў вядомы як адзін з найбуйнейшых у рэгіёне цэнтраў анлайн-махлярства, адмывання грошай і гандлю людзьмі.

Тысячы людзей заманьвалі туды абяцаннямі добра аплачванай працы, а затым прымушалі ўдзельнічаць у складаных махлярскіх схемах і выкрадаць мільярды даляраў у ахвяр па ўсім свеце.

Тыя, каму ўдавалася збегчы адтуль (або заплаціць выкуп), апісвалі жорсткія ўмовы ўтрымання, калі людзей прымушалі працаваць шмат гадзін, катавалі і збівалі тых, хто не выконваў план па прыбытку.

Хоць многія людзі трапляюць у скам-цэнтры ў выніку гандлю людзьмі, эксперты кажуць, што іншыя працуюць добраахвотна, спадзеючыся зарабіць у нелегальнай індустрыі больш, чым яны могуць атрымаць у сябе на радзіме.

KK Park і іншыя падобныя аб'екты ў асноўным кіруюцца кітайскімі злачыннымі групоўкамі і ахоўваюцца мясцовымі ваенізаванымі фарміраваннямі, якія маюць сувязі з арміяй, піша Reuters.

Мяркуючы па кадрах з месца падзей і спадарожнікавых здымках, сувязь са знешнім светам у комплексе забяспечвалася за кошт тэрміналаў Starlink, прычым іх колькасць у апошні час расла (афіцыйна ў М'янме яны забароненыя).

Кампанія SpaceX заявіла ў мінулую сераду, што адключыла больш за 2500 прылад у махлярскіх цэнтрах М'янмы.

Сімвалічная аперацыя

Вайскоўцы, многія з якіх даўно звязаныя з нелегальным бізнесам, цяпер заяўляюць, што захапілі комплекс і пашыраюць кантроль над М'явадзі, галоўным гандлёвым вузлом, які звязвае краіну з Тайландам.

У апошнія тыдні вайскоўцы адціснулі паўстанцаў у некалькіх частках М'янмы, імкнучыся максімальна павялічыць колькасць месцаў, дзе можна правесці запланаваныя на снежань выбары.

Яны па-ранейшаму не кантралююць вялікія тэрыторыі краіны, раздзіраемай канфліктам з моманту ваеннага перавароту ў лютым 2021 года.

Эксперты кажуць, што вайскоўцы М'янмы даўно заплюшчваюць вочы на махлярскія цэнтры, якія прыносяць прыбытак іх саюзнікам з апалчэння, якія граюць ключавую ролю ў барацьбе з паўстанцамі.

Кіруючая хунта сутыкнулася з ціскам з боку Кітая, які выказваў незадаволенасць тым, што ў махлярстве ўдзельнічаюць кітайскія грамадзяне, і патрабаваў закрыць скам-цэнтры.

Аднак, на думку аналітыкаў, рэпрэсіі супраць такіх цэнтраў, хутчэй за ўсё, з'яўляюцца сімвалічнымі мерамі, арганізаванымі ў спробе супакоіць Кітай, пры гэтым не наносячы сур'ёзнай шкоды велізарным прыбыткам ад махлярскіх схем, адзначае AFP.

СМІ пісалі, што ўлады М'янмы ўжо праводзілі рэйды ў KK Park, аднак пасля комплекс толькі пашыраўся.

У KK Park працягваецца махлярская дзейнасць, а вайскоўцы, верагодна, узялі пад кантроль толькі частку шырокага комплексу.

Крыніца таксама мяркуе, што Пекін дае вайскоўцам М'янмы спісы кітайскіх грамадзян, якіх ён хоча вывезці са скам-цэнтраў і адправіць для суда ў Кітай.

• 4
• 0
• 1
• 2
• 0
• 0
• 1
• 0