Гэтыя львы — адзіныя ў свеце, якія палююць на марскую здабычу
Чаму яны перасяліліся да акіяна?
У Намібіі група пустынных ільвоў пакінула свае традыцыйныя паляўнічыя ўгоддзі і выправілася да ўзбярэжжа Атлантычнага акіяна — яны сталі адзінымі ў свеце ільвамі, якія палююць на марскую здабычу. Пра іх расказвае Бі-бі-сі.
Бельгійская фатографка Грыт Ван Мальдэрэн зрабіла здымак Гамы, адной з намібійскіх пустынных ільвіц, якая навучылася паляваць на цюленяў, каб выжыць у суровых умовах Узбярэжжа Шкілетаў.
Цяпер ільвіцы тры з паловай гады, яна стала грознай паляўнічай, здольнай за адну ноч забіць да 40 цюленяў.
Фота Ван Мальдэрэн атрымала асаблівую адзнаку на прэстыжным конкурсе Wildlife Photographer of the Year, які праводзіць Музей прыродазнаўства ў Лондане.
Уздоўж Узбярэжжа Шкілетаў жывуць толькі 12 пустынных ільвоў з агульнай папуляцыі прыкладна ў 80 асобін. Яны перасяліліся з засушлівай пустыні да Атлантычнага акіяна ў пошуках ежы, кардынальна змяніўшы свой рацыён і паводзіны, каб прыстасавацца да новага асяроддзя.
Гама належыць да першага пакалення ільвоў, якія выраслі на Узбярэжжы Шкілетаў, кажа Філіп Стандэр, эксперт па захаванні прыроды, які адсочвае намібійскіх пустынных ільвоў з 1980 года.
Пустынныя львы Намібіі некалі жылі ўздоўж Узбярэжжа Шкілетаў у 1980‑х гадах, але вымушаны былі адступіць углыб пустыні пасля засухі і канфліктаў з фермерамі, якія знішчылі большасць папуляцыі, кажа Стандэр. Праз больш як 30 гадоў жывёлы «знайшлі шлях назад да ўзбярэжжа».
Гэтыя львы прыстасаваліся да жыцця ў найбольш непрыдатнай мясцовасці, якую толькі можна ўявіць — у вялізным моры пясчаных дзюн без аніякай расліннасці.
У 2015 годзе ільвы зноў выйшлі да мора і пачалі паляваць на ўзбярэжжы пасля таго, як засуха знішчыла іхнюю звыклую здабычу ў глыбіні кантынента — страусаў, арыксаў і спрынгбокаў (віды антылоп).
На ўзбярэжжы львы ядуць у асноўным бакланаў, фламінга і цюленяў.
Каментары