Жанчына набыла спартыўны касцюм беларускага брэнду за 600 рублёў і ў шоку ад якасці
«Пасля прымеркі стаяла як ялінка — уся ў бардовых катышках».
Пра непрыемную гісторыю беларуска Наталля расказала ў Threads. Яна вырашыла набыць сабе касцюм з начосам беларускага брэнда Uno mas Uno. Каштаваў той не сказаць каб бюджэтна — 590 рублёў.
Першыя сумневы наконт якасці ўзніклі яшчэ падчас прымеркі ў краме. Наталлю засмуціла тое, што яна, пасля таго як зняла джогеры і світшот, стаяла «як ялінка — уся ў бардовых катышках». Але кансультантка запэўніла, што ўсё добра. Маўляў, два разы памыеце касцюм — і ўсё пройдзе. Жанчына і паверыла.
На жаль, парада не дапамагла. Наталля кажа, што мыла ўжо не раз і не два, але ж вынік жудасны:
— Уся пралка, уся ванна і кватэра ў катышках з касцюма.
Расчараваная кліентка напісала заснавальніцы брэнда і дадала фота ванны, у якой сапраўды шмат катышкаў. Тая адказала толькі, што будзе высвятляць, у чым праблема, але дадала, што пастаўшчыкоў яны не мяняюць і заўсёды працуюць толькі з праверанымі.
Пакупніцу такі адказ пакрыўдзіў, бо яна лічыць сябе пастаяннай і лаяльнай кліенткай брэнда. Але пасля публікацыі гісторыі сітуацыя глабальна не змянілася — заснавальніца брэнда напісала толькі з патрабаваннем выдаліць допіс і скрыншот перапіскі.
Сама ж Наталля задаецца пытаннем, чаму за такую якасць просяць столькі грошай.
Брэнд Uno mas Uno стварылі ў 2019 годзе стылісткі Юлія Меднік і Таццяна Лаўрэнава. Яны вырашылі шыць адзенне аверсайз, бо абедзве сутыкаліся з неабходнасцю перашываць рэчы пасля куплі. Традыцыйна адзенне Uno mas Uno яркіх колераў.
Дарэчы, гісторыя Наталлі не першая, калі беларускі скардзяцца на якасць айчынных дарагіх брэндаў. Нядаўна блогерка Крысціна Джунько, стваральніца інстаграм-блога «Тяжёлый Маркс», распавяла пра дарагое паліто The Inka, якое сапсавалася пасля 20‑хвіліннага шпацыру пры высокай вільготнасці (нават не пад дажджом). Тады стваральніца брэнда адказала, быццам іх паліто нельга насіць, калі на вуліцы не вельмі суха. Але ў выніку Крысціна змагла здаць сапсаваную вопратку і вярнуць за яе грошы.
Свецкае жыццё Дар’і Шманай: дні нараджэння дзяцей Кіркорава і Comedy Club4
Каментары