Скандал у Брытаніі: кампанія звальняе брытанскіх супрацоўнікаў, але наймае беларусаў
Брытанская кампанія Anglo American, якая займаецца распрацоўкай шахты Вудсміт у Паўночным Ёркшыры (Вялікабрытанія), патрапіла ў скандал. Па інфармацыі крыніц The Mirror, кампанія звальняе брытанскіх супрацоўнікаў, але ў той жа час наймае грамадзян Беларусі, заўважыў Reform.news.
Шахта Вудсміт (Woodsmith Mine) — найбуйнейшы прыватны інфраструктурны праект у Брытаніі. На шахце плануюць здабываць палігаліт, які выкарыстоўваецца для вытворчасці ўгнаенняў.
Менавіта ў Паўночным Ёркшыры размешчана найбуйнейшае ў свеце радовішча палігалітавых руд.
Anglo American, па новай дамове зліцця з канадскай Teck Resources, пакіне штаб-кватэру ў Вялікабрытаніі і пераедзе ў Ванкувер перад запланаваным пачаткам вытворчасці ў 2030 годзе.
«Гэты крок ставіць пад пагрозу звальнення сотні супрацоўнікаў, якія працуюць у лонданскім офісе Anglo. Аднак пры гэтым кампанія наймае працаўнікоў з Беларусі — краіны, супраць якой брытанскім урадам уведзеныя санкцыі, уключаючы замарозку актываў і забарону на экспарт і імпарт пэўных тавараў», — піша выданне.
Кампанія тлумачыць, што наймае беларусаў з-за «спецыялізаваных навыкаў па праходцы шахтавых ствалоў і будаўніцтве тунэляў».
Сітуацыяй абураныя мясцовыя палітыкі, а інвестары выказваюць занепакоенасць.
На публічных абмеркаваннях праекта прадстаўнік Anglo American адзначыў, што на шахце Вудсміт цяпер працуюць 1100 чалавек, з іх 75% — мясцовыя жыхары і амаль 100 чалавек — замежнікі са «спецыялізаванымі навыкамі».
«Мы праводзім праходку двух глыбокіх шахтавых ствалоў на рудніку, выкарыстоўваючы найноўшыя тэхналогіі — праходчыя камбайны SBR. Гэта ўсяго толькі трэці праект у свеце, дзе выкарыстоўваюцца SBR для праходкі ствалоў. Апошні такі праект быў у Беларусі. Redpath Deilmann, наш падрадчык па праходцы ствалоў, быў наняты для выканання гэтых прац і выкарыстаў асноўную каманду з таго праекту, каб працаваць з намі на Woodsmith, забяспечваючы максімальна эфектыўнае і бяспечнае ўжыванне ўсіх тэхнічных і спецыялізаваных навыкаў для праходкі ствалоў», — заявіў прадстаўнік кампаніі.
Нямецкая Redpath Deilmann была падрадчыкам на будаўніцтве Нежынскага ГАК.
Па словах прадстаўніка Anglo American, ключавая каманда спецыялістаў складаецца з 50 чалавек з Усходняй Еўропы, у асноўным з Беларусі.
«Мы цэнім уклад, які зрабілі замежныя работнікі, і вітаем іх на праекце», — заявілі ў Anglo American.
Каментары