Skandał u Brytanii: kampanija zvalniaje brytanskich supracoŭnikaŭ, ale najmaje biełarusaŭ
Brytanskaja kampanija Anglo American, jakaja zajmajecca raspracoŭkaj šachty Vudśmit u Paŭnočnym Jorkšyry (Vialikabrytanija), patrapiła ŭ skandał. Pa infarmacyi krynic The Mirror, kampanija zvalniaje brytanskich supracoŭnikaŭ, ale ŭ toj ža čas najmaje hramadzian Biełarusi, zaŭvažyŭ Reform.news.
Šachta Vudśmit (Woodsmith Mine) — najbujniejšy pryvatny infrastrukturny prajekt u Brytanii. Na šachcie płanujuć zdabyvać palihalit, jaki vykarystoŭvajecca dla vytvorčaści ŭhnajeńniaŭ.
Mienavita ŭ Paŭnočnym Jorkšyry raźmieščana najbujniejšaje ŭ śviecie radovišča palihalitavych rud.
Anglo American, pa novaj damovie źlićcia z kanadskaj Teck Resources, pakinie štab-kvateru ŭ Vialikabrytanii i pierajedzie ŭ Vankuvier pierad zapłanavanym pačatkam vytvorčaści ŭ 2030 hodzie.
«Hety krok stavić pad pahrozu zvalnieńnia sotni supracoŭnikaŭ, jakija pracujuć u łondanskim ofisie Anglo. Adnak pry hetym kampanija najmaje pracaŭnikoŭ ź Biełarusi — krainy, suprać jakoj brytanskim uradam uviedzienyja sankcyi, uklučajučy zamarozku aktyvaŭ i zabaronu na ekspart i impart peŭnych tavaraŭ», — piša vydańnie.
Kampanija tłumačyć, što najmaje biełarusaŭ z-za «śpiecyjalizavanych navykaŭ pa prachodcy šachtavych stvałoŭ i budaŭnictvie tunelaŭ».
Situacyjaj aburanyja miascovyja palityki, a inviestary vykazvajuć zaniepakojenaść.
Na publičnych abmierkavańniach prajekta pradstaŭnik Anglo American adznačyŭ, što na šachcie Vudśmit ciapier pracujuć 1100 čałaviek, ź ich 75% — miascovyja žychary i amal 100 čałaviek — zamiežniki sa «śpiecyjalizavanymi navykami».
«My pravodzim prachodku dvuch hłybokich šachtavych stvałoŭ na rudniku, vykarystoŭvajučy najnoŭšyja technałohii — prachodčyja kambajny SBR. Heta ŭsiaho tolki treci prajekt u śviecie, dzie vykarystoŭvajucca SBR dla prachodki stvałoŭ. Apošni taki prajekt byŭ u Biełarusi. Redpath Deilmann, naš padradčyk pa prachodcy stvałoŭ, byŭ naniaty dla vykanańnia hetych prac i vykarystaŭ asnoŭnuju kamandu z taho prajektu, kab pracavać z nami na Woodsmith, zabiaśpiečvajučy maksimalna efiektyŭnaje i biaśpiečnaje ŭžyvańnie ŭsich techničnych i śpiecyjalizavanych navykaŭ dla prachodki stvałoŭ», — zajaviŭ pradstaŭnik kampanii.
Niamieckaja Redpath Deilmann była padradčykam na budaŭnictvie Niežynskaha HAK.
Pa słovach pradstaŭnika Anglo American, klučavaja kamanda śpiecyjalistaŭ składajecca z 50 čałaviek z Uschodniaj Jeŭropy, u asnoŭnym ź Biełarusi.
«My cenim układ, jaki zrabili zamiežnyja rabotniki, i vitajem ich na prajekcie», — zajavili ŭ Anglo American.
Niaklajeŭ apublikavaŭ złabadzionny vierš. U im zhadvajecca i Kaleśnikava z Babarykam, i Cichanoŭskaja, i Prakopjeŭ z Paźniakom23
Kamientary