У Гомелі асудзілі мясцовага евангельскага прапаведніка. Верагодна, па справе Гаюна
У Гомелі мясцовага жыхара, 41‑гадовага хрысціянскага прапаведніка Аляксея Ягелу асудзілі за «садзейнічанне экстрэмісцкай дзейнасці» паводле дзвюх частак арт. 361‑4 Крымінальнага кодэкса. Дакладны тэрмін пакуль невядомы, але вядома, што яму прызначана пакаранне, звязанае з пазбаўленнем волі — ці калонія, ці «хімія», піша «Гомельская вясна».
Аляксей Ягела па адукацыі хірург, але па спецыяльнасці не працаваў. Ён вядомы як евангельскі прапаведнік і прапагандыст здаровага ладу жыцця, у мінулым годзе пра яго нават пісала дзяржаўная газета.
У чым канкрэтна Ягелу абвінавачвалі, невядома, аднак, паводле ўсёй наяўнай інфармацыі, хутчэй за ўсё пераслед звязаны з маніторынгавым каналам «Беларускі Гаюн», які з 2022 года адсочваў перамяшчэнні расійскіх войскаў у Беларусі і да чата якога сілавікі атрымалі доступ у пачатку 2025-га.
Каментары