Мінабароны Расіі прызнала масаваны ўдар па энергасістэме Украіны з выкарыстаннем ракет «Кінжал»
Расійскае вайсковае ведамства афіцыйна пракаментавала начную атаку на ўкраінскія рэгіёны. У заяве адкрыта прызнаецца, што адной з асноўных цэляў сталі аб’екты энергетыкі Украіны.
Сярод выкарыстаных сродкаў знішчэння Міністэрства абароны РФ асобна вылучыла аэрабалістычныя гіпергукавыя ракеты «Кінжал», якія, паводле іх заявы, дасягнулі зададзеных цэляў.
Удар традыцыйна быў названы «адказам на тэрарыстычныя атакі Украіны па цывільных аб’ектах на тэрыторыі Расіі». Акрамя энергетычнай інфраструктуры, расійскі бок заяўляе аб пашкоджанні прадпрыемстваў ВПК.
Уночы ў аўторак Украіна перажыла маштабную камбінаваную атаку з боку Расіі. Паводле звестак Паветраных сіл УСУ, для ўдару было выкарыстана 635 ударных беспілотнікаў і 38 ракет, у тым ліку тры аэрабалістычныя ракеты «Кінжал».
У выніку атакі загінулі тры чалавекі, у тым ліку чатырохгадовае дзіця.
Пашкоджанні атрымалі шматпавярховыя і прыватныя жылыя дамы.
Энергетычная інфраструктура сур'ёзна пашкоджана ў шэрагу рэгіёнаў: Ровенская, Цярнопальская і Хмяльніцкая вобласці апынуліся амаль цалкам абясточанымі. Значныя праблемы са святлом назіраюцца ў Адэскай, Вінніцкай, Жытомірскай, Чарнігаўскай і іншых абласцях.
Цяпер чытаюць
Хто з беларусаў трапіў на прыём да прэзідэнта Польшчы ШМАТ ФОТА42
Каментары
Ну няўжо для гэтага навукоўцы, інжынеры, майстры над гіпергукам працавалі?! Пэўна, верылі, што Радзіму бароняць, супраць авіяносцаў змагаюцца... А іхнай зброяй - па энергетыцы! Што адчуваюць, што думаюць?...