Топ-чыноўнік РПЦ назваў Зяленскага, Парашэнку і іншых прэзідэнтаў Украіны «сатаністамі» і заклікаў перамагчы іх малітвай і пастом
Словы мітрапаліта Кірыла зала сустрэла працяглымі апладысментамі.
Старшыня Сінадальнага аддзела Рускай праваслаўнай царквы ва ўзаемадзеянні з узброенымі сіламі і праваахоўнымі органамі мітрапаліт Кірыл (Пакроўскі) у панядзелак на канферэнцыі назваў прэзідэнта Украіны Уладзіміра Зяленскага, яго папярэдніка Пятра Парашэнку, іншых прэзідэнтаў краіны і кіраўніка офіса Зяленскага Кірыла Буданава «сатаністамі». Паводле слоў Кірыла, для перамогі над імі адной зброі недастаткова — патрэбныя малітва і пост, піша «Агенцтва».
«Што можна зрабіць супраць сатаніста Зяленскага, сатаніста-тэрарыста Буданава, сатаніста Парашэнкі, амаль усіх прэзідэнтаў украінскіх — сатаністаў, пачынаючы з першага, так бы мовіць, прэзідэнта. <…> Колькі там сатаністаў, якіх выхавалі ўніяты, заходнікі, НАТА і гэтак далей, і гэтак далей. Што супраць іх можа зрабіць… так, Зяленскага можна, безумоўна… снарад можа прыляцець. Але да канца гэты сатанізм вынішчыць немагчыма. Таму, акрамя прафесіяналізму воінаў, акрамя зброі, патрэбныя ў тым ліку малітва і пост. У Евангеллі мы чуем словы Хрыста, калі апосталы спыталі: «чаму не маглі мы выгнаць д’ябла з гэтага юнака?» Ён кажа: «гэты род можа быць пераможаны малітвай і постам»», — сказаў мітрапаліт Кірыл на канферэнцыі «Абарона Праваслаўя і Рускага свету — заклад пераўтварэння Расіі» ў Цэнтральным доме Расійскай арміі.
Словы мітрапаліта зал сустрэў працяглымі воплескамі.
Малітва аб перамозе над ворагам — цалкам звычайная з’ява падчас вайны, пракаментаваў «Агенцтву» выказванні мітрапаліта Кірыла рэлігіязнаўца Канстанцін Міхайлаў. «Прэзідэнтаў іншых краін звычайна не называюць сатаністамі, але ідэя, што мы змагаемся са злом, таксама даволі звыклая», — сказаў Міхайлаў.
У якасці прыкладу малітвы аб перамозе над ворагам Міхайлаў прывёў малітву патрыярха Кірыла «аб Святой Русі», якую кіраўнік РПЦ прачытаў 25 верасня 2022 года. У ёй патрыярх прасіў аб дапамозе, але не даваў ацэнак Украіне і яе ўладам.
Падчас навагодняга малебну ў снежні 2025 года патрыярх заклікаў маліцца аб «добрых пераменах ва Украіне».
Цяпер чытаюць
«Месяцамі ў кабіне, на сябе забіў. І стаў пытаць: можа, жонка таксама будзе працаваць?». Чаму эміграцыя разбівае сем’і і што рабіць, каб усё паправіць4040
Каментары
Благословляйте проклинающих вас.
Убийство, насилие ,воровство,лихоимство, детей делают сиротами, жён вдовами и т.д. - секта РПЦ- "православные атеисты"