Бачылі сям’ю на ўпакоўцы вядомага батона? Іх адшукалі ў Threads
Адна з карыстальніц Threads зацікавілася пытаннем: а хто ж тая сям’я, чыё фота можна пабачыць на ўпакоўцы батона «Для вашай сям’і», і чаму людзі пагадзіліся сфатаграфавацца. Нечакана ў каментары прыйшла жанчына са здымка і ўсё расказала.
«Мы тая самая сям’я на батоне», — напісала Юлія Айгумава і ў якасці доказу дадала свежы сямейны здымак з адпачынку. Вядома, яе адразу завалілі пытаннямі.
Высветлілася, што сям’я Айгумавых — Юлія, яе муж Руслан і іх дзеці Ева і Багдан — жывуць у Гродне. Сама Юлія працуе майстрыцай манікюру і педыкюру, а таксама праводзіць навучанні. А яе дачка Ева ўжо даўно спрабавала сябе ў мадэлінгу.
Жанчына распавяла, што проста даслала фота на конкурс, які праводзіў Слуцкі хлебазавод, — і менавіта яно перамагло. Дарэчы, сам здымак быў зроблены пяць гадоў таму.
У каментарах пацікавіліся, ці атрымалі Айгумавы ганарар за тое, што цяпер на іх фота глядзіць уся Беларусь. Юлія пацвердзіла, што грошы ім сапраўды заплацілі, але памер сумы не агучвала.
Спыталі і пра тое, ці есць сама сям’я той батон «Для вашай сям’і». Жанчына прызналася, што ў Гродне ён не прадаецца, а вось калі яны прыязджаюць у Мінск, то набываюць адразу шмат — каб потым падарыць бабулям і дзядулям, ды каб дзеці маглі аднесці ў садок і школу.
Людзі жартуюць, што на фразу «Я вас недзе ўжо бачыў», Юлія можа смела адказваць: «На батоне!». А жанчына расказала, што яшчэ не было выпадку, каб іх на вуліцы нехта пазнаў — затое на касе ў краме, калі яны набываюць шмат батонаў на падарункі, пазнаюць заўсёды.
Юліі напісалі шмат прыемных слоў: «Ваша сям’я для мяне ўжо як родная!», «Вы вельмі мілыя, добра выглядаеце на маім любімым батоне», «Калі купляю яго, заўсёды мужу кажу «батон са шчаслівай сям'ёй» і мой муж адразу разумее, які батон я ўзяла».
Увогуле, ідэя завода размясціць на ўпакоўцы фота рэальнай беларускай сям'і спадабалася людзям: «Ідэя, дарэчы, топ. Можна кожны год мяняць сем’і. Будзе рэнтабельнасць шалёная. Я б усім сваякам купляла свой батон». Юлія пажартавала ў адказ: «Нічога не трэба мяняць. Пяць гадоў вісім на гэтым батоне, можам яшчэ дваццаць».
Памятаеце фота, як сцюардэса «Белавія» адпачывала ў турбіне самалёта? Дзяўчына распавяла яго гісторыю
Як склаўся лёс выпускнікоў, якімі журфак ганарыўся 10 гадоў таму? Гісторыя аднаго ўрачыстага калажа
Туск і гродзенцы на каленях: расійская прапаганда выкарыстоўвае ФОТА 18‑гадовай даўніны, каб абразіць Украіну
Цяпер чытаюць
28‑гадовую ўкраінку з Марыупаля асудзілі ў Мінску за палітыку. Чаму яна прыехала з Польшчы ў Беларусь, няясна3
Каментары