Мінабароны РФ упершыню прызнала ўдары па Расіі новымі ўкраінскімі ракетамі «Фламінга»
Мінабароны РФ паведаміла, што яны збілі за суткі пяць украінскіх ракет «Фламінга».
Расійскае ваеннае ведамства ўпершыню афіцыйна пацвердзіла, што Украіна пачала выкарыстоўваць для ўдараў у глыб Расіі свае найноўшыя крылатыя ракеты «Фламінга».
У сённяшняй зводцы паведамляецца, што расійская СПА за суткі збіла пяць такіх ракет. Такое адбылося ўпершыню, хоць Кіеў яшчэ ў студзені заяўляў аб паспяховых пусках па палігоне «Капусцін Яр».
Гэтым разам цэллю атакі стаў вялізны ваенны арсенал у раёне Катлубані, што ў Валгаградскай вобласці. Гэта адзін з найбуйнейшых складаў боепрыпасаў расійскай арміі. Ад тэрыторыі, якую кантралюе Украіна, да гэтага склада каля 500 кіламетраў.
Генштаб УСУ пацвердзіў, што ўдар быў нанесены менавіта ракетамі «Фламінга». На відэазапісах з месца здарэння відаць маштабныя выбухі, а мясцовыя ўлады былі вымушаныя тэрмінова эвакуяваць жыхароў пасёлка. Губернатар вобласці заявіў, што ўсе ракеты нібыта збілі, а пажар пачаўся з-за «падзення абломкаў» на тэрыторыю вайсковай часткі.
Што ж гэта за «Фламінга»? Гэта ўкраінская распрацоўка, пра якую ўпершыню гучна загаварылі летам 2025 года. Самае ўражлівае ў ёй — далёкасць. Распрацоўшчыкі сцвярджаюць, што ракета можа ляцець больш чым на 3 тысячы кіламетраў. То-бок пад ударам можа апынуцца практычна ўся еўрапейская частка Расіі аж да Урала.
Цяпер чытаюць
«Стрэльба калі і стрэліць, то наўрад ці кулямётнай чаргой». Максім Знак ацаніў рэальнасць пагроз беларускай прапаганды пазбавіць грамадзянства палітэмігрантаў1212
Каментары