МЗС пра паветраныя шары з цыгарэтамі: Гэта трансгранічная злачыннасць
«Літоўскаму боку па нейкай прычыне выгадна лічыць гэта гібрыднай пагрозай», — сцвярджае намеснік міністра Ігар Секрэта.
Кантрабанда цыгарэт у Літву з’яўляецца звычайнай трансгранічнай злачыннасцю, з якой трэба змагацца сумеснымі намаганнямі, а не гібрыднай пагрозай, як гэта спрабуе падаць літоўскі бок. Пра гэта заявіў намеснік міністра замежных спраў Ігар Секрэта па выніках сустрэчы прэм’ер-міністра Аляксандра Турчына з літоўскімі і польскімі перавозчыкамі, піша БелТА.
«Пытанняў у двухбаковых адносінах з Літвой шмат. Гэта і пытанні бяспекі, і праваахоўных органаў, гэта і пытанні, напэўна, ужо надакучлівых для ўсіх паветраных шароў, якімі дастаўляецца кантрабанда цыгарэт, — сказаў Ігар Секрэта.
— Нам не дае дамовіцца тое, што ў нас рознае разуменне таго, што сёння адбываецца на мяжы. Літоўскаму боку па нейкай прычыне выгадна лічыць гэта гібрыднай пагрозай, бо за пагрозу шчодра плацяць у Еўропе, гэта шакіруе, уражвае і не патрабуе дадатковых дыскусій. А мы ж лічым, што маем справу са звычайнай трансгранічнай злачыннасцю, у якой удзельнічаюць прадстаўнікі розных краін. Калі ёсць розніца ў цэнах, заўсёды будзе спакуса нешта паставіць у абыход і зарабіць на гэтым. Гэта, уласна, было заўсёды на сумеснай мяжы, пакуль існавала розніца ў цэнах».
Ён падкрэсліў, што змагацца з трансгранічнай злачыннасцю трэба сумесна — праз супрацоўніцтва і дыялог. «А калі кан’юнктурна, тады патрэбна інфармацыйная бомба, якая «выбухае» і прыцягвае вельмі шмат увагі ў краінах Еўрасаюза. І гэта зусім іншыя грошы. Мы ж кажам: давайце працаваць разам і зарабляць на грузаперавозках, на сумеснай навуковай і культурнай дзейнасці. Давайце адкрыем мяжу і зробім яе прадказальнай і бяспечнай для грамадзян усіх краін — не толькі для Беларусі, Літвы і Польшчы», — зазначыў намеснік міністра.
Нагадаем, што з-за шароў з кантрабандай некалькі разоў парушалася праца Віленскага аэрапорта, Літва ў выніку на тры тыдні закрыла мяжу з Беларуссю, а беларускія ўлады ў адказ не выпусцілі літоўскія грузавікі.
Каментары