Трамп пагражае ўзарваць газавае радовішча Паўднёвы Парс, калі Іран атакуе Катар
«З такой сілай, якую Іран ніколі не бачыў», — напісаў прэзідэнт ЗША.
Прэзідэнт ЗША Дональд Трамп пагражае ўзарваць газавае радовішча Паўднёвы Парс, калі Іран атакуе Катар.
Трамп апублікаваў доўгі пост на сваёй платформе Truth Social пра атаку на іранскае газавае радовішча Паўднёвы Парс. Ён піша, што ЗША «нічога не ведалі» пра ізраільскую атаку, але калі Іран зноў нанясе ўдар у адказ па Катары, Вашынгтон пойдзе на эскалацыю.
Паводле Трампа, Ізраіль ударыў па радовішчы «са злосці» і паразіў «адносна невялікую частку ўсяго аб’екта». Затым Іран, які «гэтага не ведаў», у адказ атакаваў катарскі завод звадкаванага прыроднага газу ў Рас-Лафане, што, па словах прэзідэнта ЗША, было «неапраўдана і несправядліва».
Ізраіль больш не будзе атакаваць Паўднёвы Парс, абяцае Трамп, называючы радовішча «надзвычай важным і каштоўным».
Але калі Іран атакуе Катар, то ўжо ЗША «ўзарвуць» гэта радовішча «з такой сілай, якую Іран ніколі не бачыў».
Трамп дадаў, што не хоча дапускаць «такога ўзроўню гвалту і разбурэнняў з-за доўгатэрміновых наступстваў» для Ірана, «але калі ЗПГ Катара зноў будзе атакаваны, ён зробіць гэта без ваганняў».
Каментары