Беларускі «злодзей у законе» ўдзельнічаў у анлайн-сходках аўтарытэтаў ва ўкраінскіх СІЗА

Як адзначаецца ў паведамленні дэпартаменту, за апошнія некалькі месяцаў у «абшчак» пералічылі больш за 700 тысяч грыўняў (амаль 16 тысяч даляраў), якія сабралі ад распаўсюджвання наркотыкаў сярод зняволеных у Хмяльніцкім следчым ізалятары. Апроч таго, следчыя задакументавалі шматлікія факты вымагальніцтва грошай.

Гэтую дзейнасць пад кіраўніцтвам двух «злодзеяў у законе», у тым ліку беларускага, у ізалятары ажыццяўляў грамадзянін Азербайджана, вядомы па мянушцы «Рамін Гянжынскі», які неаднаразова адбываў пакаранні ў Расіі, а летась яго затрымалі ва Украіне. У функцыянаванні злачыннай сеткі ўдзельнічалі асобы, якія мелі статус «смотрящих» за СІЗА, за «гульнёй і чорным», а таксама «за каранцінам».

Паводле следчых, сходкі адбываліся ў фармаце аўдыё– і відэаканферэнцый паміж зняволенымі розных устаноў выканання пакаранняў, а таксама з удзелам асоб, якія знаходзіліся на свабодзе і за межамі Украіны.

«Падчас такіх сходак удзельнікі абмяркоўвалі размеркаванне сфер уплыву, каардынацыю злачыннай дзейнасці, збор сродкаў у «абшчак», наркатрафік, правядзенне азартных гульняў, а таксама механізмы ціску на іншых арыштантаў», — адзначылі ў дэпартаменце паліцыі.

Апрача таго, задакументавалі 12 фактаў вымагальніцтва грошай у асоб, якія знаходзіліся ў следчым ізалятары, а таксама шматлікія факты збыту псіхатропаў і наркотыкаў. Пацярпелых прымушалі перадаваць ад 30 до 80 тысяч грыўняў (ад 670 да 1 800 даляраў).

Аператыўныя службы паліцыі сумесна з СБУ і двума спецыяльнымі падраздзяленнямі правялі адначасова адразу некалькі вобшукаў у камерах следчага ізалятара і па месцы пражывання асобных фігурантаў. Падчас вобшукаў сканфіскавалі мабільныя тэлефоны, банкаўскія карткі, у тым ліку і тыя, на якіх акумулявалі сродкі «абшчака», чарнавыя запісы і грошы.

Пяці ўдзельнікам злачынных сходак, якія знаходзяцца ў СІЗА, выставілі падазрэнні паводле шасці артыкулаў Крымінальнага кодэкса Украіны, у тым ліку ў арганізацыі злачынных сходаў, вымагальніцтве, пагрозах супрацоўнікам праваахоўных органаў, у незаконным збыце псіхатропаў і наркотыкаў. Пра завочнае выстаўленне падазрэння беларускаму «злодзею ў законе» не паведамляюць.

Аляксандр Мядзведзеў нарадзіўся ў Гомелі 2 студзеня 1970 года. Упершыню трапіў у турму ў 2006 годзе. Першыя прысуды атрымаў за крадзяжы, а пазней — за вымагальніцтва і распаўсюд наркотыкаў. Адбываў пакаранні ў розных папраўчых калоніях Беларусі — у Ваўкавыску, Баранавічах, Мазыры, Глыбокім, Віцебску і Гомелі. У 2012 годзе яго каранавалі на зладзейскай сходцы ў Дубаі. Але мянушку «Медзвяжонак Гомельскі» ён атрымаў пасля першых прысудаў.

Пасля аднаго з вызваленняў Мядзведзеў выехаў з Беларусі ў Расію, але ў сакавіку 2013 года яго затрымалі ў Маскве ў межах сумеснай беларуска-расійскай спецыяльнай аперацыі. Праз год пасля адбывання ў Мурманскай вобласці пакарання за распаўсюд наркотыкаў яго этапавалі ў Беларусь. У 2014 годзе ў Гомелі яго асудзілі на 7 гадоў пазбаўлення волі за вымагальніцтва.

У сакавіку 2024 году начальнік ГУБАЗіКа Андрэй Ананенка ў інтэрв'ю дзяржаўнаму выданню sb.by паведаміў пра чарговае вызваленне Аляксандра Мядзведзева з турмы і намякнуў, што ён зноў пакінуў тэрыторыю Беларусі.

• 0
• 0
• 3
• 6
• 2
• 0
• 0
• 1