Запуск новага маршруту дазволіць прыбраць паток фур з МКАД, што крытычна важна для бяспекі і разгрузкі руху, асабліва ў складаны зімовы перыяд.
Рух па новай дарозе, якая злучыць два буйныя прыгарады Мінска, запусцяць да канца года. Пра гэта распавёў генеральны дырэктар Упраўлення дарожна-маставога будаўніцтва і дабраўпарадкавання Мінгарвыканкама Уладзімір Латушкін.
— Будаўніцтва пад’язной дарогі, якая злучыць Калядзічы і пасёлак Гатава — адзін з найважнейшых інфраструктурных праектаў для сталіцы. Запусціць рух па ёй мы плануем да канца года. Новая дарога дазволіць заўважна разгрузіць МКАД. Асабліва гэта важна перад зімовым перыядам. Практыка паказвае, што менавіта ў гэты час года фуры ствараюць найбольшыя нязручнасці на МКАД, — паведаміў Уладзімір Латушкін.
Работы па будаўніцтве новай дарогі стартавалі 4 месяцы таму, нагадвае Realt. Нягледзячы на тое, што ў прамвузле Калядзічы працуюць каля 100 кампаній (транспартныя, лагістычныя і складскія прадпрыемствы), прамога выезду на МКАД-2 у гэтага буйнога прамысловага і лагістычнага вузла да гэтага часу не было. Таму велікагрузам даводзілася рухацца ў аб’езд праз кальцавую.
Новая дарога павінна вырашыць гэтую праблему. Яна забяспечыць прамыя зносіны паміж Калядзічамі і Гатавам, дазволіць грузавому транспарту хутчэй дабірацца да МКАД-2 і часткова разгрузіць кальцавую дарогу.
Будаўніцтва новай дарогі, якая злучыць прамвузел Калядзічы і аграгарадок Гатава, ідзе без выхадных.
Агульная працягласць новай дарогі складзе каля 6,2 км. Дарога будзе выходзіць з вуліцы Бабушкіна, праходзіць уздоўж чыгункі і выходзіць у аграгарадку Гатава на дарогу Н9034.
Плануецца, што яна будзе двухпалоснай з умацаванай абочынай, па якой змогуць ездзіць веласіпедысты. Акрамя таго, на дарозе прадугледжана чатыры аўтобусныя прыпынкі і пляцоўка для адпачынку.
Цяпер чытаюць
Той самы масажыст расказаў, навошта здымаў голых кліентак11
Каментары