Апошні дзень працы крамы VDOM у мінскім гандлёва-забаўляльным цэнтры «Спектр» прыпаў на 28 верасня, піша Blizko.by.
Кампанія паведаміла ў сацыяльных сетках, што пасля дзевяці гадоў працы гісторыя VDOM у Беларусі завяршылася. Прадстаўнікі сеткі падзякавалі пакупнікам за давер, падтрымку і водгукі, адзначыўшы, што для іх VDOM была не проста крамай посуду і тавараў для дома.
Мінская крама ў «Спектры» заставалася апошняй пасля закрыцця 23 верасня магазіна ў ГЦ «Цівалі». У апошнія месяцы сетка паступова згортвала дзейнасць па ўсёй Беларусі. Рэшткі тавараў распрадавалі са зніжкамі ад 70 да 90 працэнтаў. У пачатку мінулага тыдня спыніла працу і інтэрнэт-крама VDOM.
У розныя гады сетка налічвала да 35 крам. Яны працавалі не толькі ў Мінску, але і ў Віцебску, Гомелі, Гродне, Бабруйску, Рэчыцы, Маладзечне і Жодзіне.
Прычыны поўнага закрыцця VDOM кампанія афіцыйна пакуль не назвала. Што адбудзецца з яе бізнэсам і брэндам далей, таксама не паведамляецца.
Каментары