«Не разумею, чаго яны хочуць дамагчыся». Прэм'ер-міністр Даніі раскрытыкавала Фінляндыю і Нарвегію за званок Пуціну
Прэм'ер-міністр Даніі Метэ Фрэдэрыксен скептычна ставіцца да тэлефоннай размовы прэзідэнта Фінляндыі Аляксандра Стуба і прэм'ер-міністра Нарвегіі Ёнаса Гара Сцёрэ з кіраўніком Крамля Уладзімірам Пуціным.
У гэты дзень Фрэдэрыксен знаходзіцца з візітам у Фінляндыі, дзе 27—28 кастрычніка збіраюцца міністры замежных спраў краін Паўночнай Еўропы, піша «Еўрапейская праўда».
«Я вельмі скептычна стаўлюся да гэтай ініцыятывы Нарвегіі і Фінляндыі. Яна не была ўзгодненая ні з кім з нас», — пракаментавала прэм'ер-міністр Даніі тэлефонную размову.
Яна падкрэсліла, што не бачыць «ніякіх прыкмет таго, што Расія імкнецца да міру з Еўропай».
«Ні з улікам гібрыднай вайны, якая працягваецца кожны дзень, ні таго, што адбываецца ва Украіне, дзе штодня здзяйсняюцца жорсткія і агрэсіўныя атакі. Я лічу, што нам трэба захоўваць адзінства Еўропы, а не дзейнічаць паасобку», — дадала Фрэдэрыксен.
Яе спыталі, ці чакае яна, што гэты званок можа зацягнуць працэс.
— Я сапраўды не ведаю, чаго яны думаюць гэтым дамагчыся. Раней мы, астатнія еўрапейцы, таксама выразна падкрэслівалі, калі іншыя дзейнічалі самастойна і ездзілі ў Маскву, што важна, каб мы, еўрапейцы, трымаліся разам. Многія з нас змагаліся за гэта ўсе гэтыя гады, — сказала Метэ Фрэдэрыксен.
Сёння прэзідэнт Фінляндыі і прэм'ер-міністр Нарвегіі па ўласнай ініцыятыве правялі тэлефонную размову з кіраўніком Крамля Уладзімірам Пуціным. Паводле слоў Стуба, размова была «адкрытай і дзелавой».
Пасля гэтага Стуб і Сцёрэ правялі «плённую тэлефонную размову» з прэзідэнтам Уладзімірам Зяленскім.
Цяпер чытаюць
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?14
Што вядома пра 18‑гадовую бяспраўніцу Дзіяну, якая разам з двума сябрамі разбілася ўначы ў Вілейскім раёне?
«Пасля першага забойства з ім развялася жонка». Што вядома пра шматдзетнага Сяргея са Столінскага раёна, які пасля вызвалення з калоніі забіў трох чалавек33
Каментары