Івашкевіч: Адных заклікаў у сацыяльных сетках «ШОС» ці «Далоў Лукашэнку» мала

Да Народнага сходу засталося тры месяцы. Ён пройдзе ў суботу 8 кастрычніка.

Сярод патрабаванняў Народнага схода: спыненне роста цэнаў, забяспечыць годныя заробкі і пенсіі, магчымасць абмену валюты, не дапусціць беспрацоўя, спыніць продаж прадпрыемстваў, гарантаваць свабодную працу незалежным СМІ, рассакрэціць прэзідэнцкі фонд.

На сёння было абвешчана, што аргкамітэты па падрыхтоўцы Народнага сходу прайшлі не толькі ў Мінску, але і ў дваццаці гарадах краіны.

«Ідэя Народнага сходу выклікае жывую цікавасць, бо ўзровень жыцця не проста ўпаў, а абрынуўся, — кажа Аляксандр Мех з Кобрына. — У канцы жніўня рабочыя прадпрыемстваў горада абяцалі нам даць нам сваіх прадстаўнікоў у аргкамітэт».

«У нас усе пласты грамадства пачынаюць аб’ядноўвацца», — кажа Яўген Канстанцінаў з Наваполацка.

Прадстаўнік прафсаюзу радыёэлектроннай прамысловасці Мікалай Пахабаў расказвае, што ўжо зараз на прадпрыемствах Мінскай вобласці было распаўсюджана 10 тысяч улётак «Не — жабрацтву народу». Па ягоных словах, гэта знаходзіць водгук рабочых.

Паводле Пахабава, людзі на заводах адкрыта абураюцца той сітуацыі, што зараз у краіне. У некаторых месцах рыхтуюцца італьянскія забастоўкі, калі працаўнікі ўсё робяць вельмі марудна. «Пакуль што людзі не гатовыя вывернуць кашулю і пайсці на акцыю, але да восені настроі пачнуць мяняцца».

Генадзь Раманюк працуе на «Беларуськаліі», ён кажа, што пратэстныя настроі на прадпрыемстве таксама растуць. «Людзей хочаць залагодзіць прэміямі, ростам заробкаў, але гэта не тыя грошы, якія яны атрымлівалі раней».

На пытанне, ці не варта сябрам аргкамітэта заклікаць сваіх прыхільнікаў прыходзіць на плошчы беларускіх гарадоў штотыдзень, а не чакаць тры месяцы, быў наступны адказ Віктара Івашкевіча.

«Некалькі тысяч чалавек яшчэ не могуць пераламаць сітуацыю.

Сітуацыя можа змяніцца, калі нас будзе ў 10–20 разоў болей. Такога эфекту нельга дасягнуць аднымі заклікамі ў сацыяльных сетках „ШОС“, ці „Далоў Лукашэнку“. Гэтага мала. Патрэбная вялікая тлумачальная праца. На хлапок гэта не атрымаецца», — кажа Івашкевіч.

Ён мяркуе, што людзі яшчэ не зусім да канца адчулі праявы крызіса. Сапраўднае ўсведамленне прыйдзе толькі восенню.

Івашкевіч гаворыць, што на ўсе ўлёткі да Народнага сходу не было выдзелена ні цэнта замежнымі фундацыямі, «усё выходзіць на народныя грошы». Для правядзення сходаў арганізатары будуць прасіць дазволеныя мясцовымі ўладамі пляцоўкі для правядзення вулічных акцый.

Дарэчы, у інтэрнэце працу пачаў адмысловы сайт Народнага сходу, дзе можна знайсці ўсю інфармацыю.

• 0
• 0
• 0
• 0
• 0
• 0
• 0
• 0