Іх адказ Чэмберлену: У Беларусь не пусцілі здымачную групу Літоўскага тэлебачання
24 жніўня супрацоўнікі пагранічнага пункта «Прывалка» (Гродзенская вобласць) адмовіліся ўпусціць у Беларусь групу карэспандэнтаў Літоўскага тэлебачання (LTV).
Як паведамляе інфармацыйны партал Delfi, карэспандэнтка тэлеперадачы «Панарама» Рута Ланкінінкайтэ на мяжы даведалася, што з’яўляецца непажаданай у Беларусі асобай і яе віза анулюецца. Ланкінінкайтэ накіроўвалася ў Гродна для падрыхтоўкі матэрыялу пра жыццё беларусаў ва ўмовах абясцэньвання валюты.
«На Райгардскім пагранічным пасту ўсё было добра, а на прапускным пасту ў Прывалцы памежнік сказаў, што я, як журналіст, з’яўляюся непажаданай асобай у гэтай краіне — персона нон грата. Ён сказаў, што мая віза анулюецца, хоць акрэдытацыя дзейная. Высвятляць сітуацыю параіў у Мінску. Заставалася толькі павярнуць назад», — расказала журналістка.
Пра інцыдэнт на мяжы яна праінфармавала пасольства Літвы ў Беларусі.
«Шкадую, што Беларусь зусім ізалявалася, закрыла межы. У гэтым выпадку няма ніводнага журналіста (літоўскага. — БелаПАН.) з дзейнай акрэдытацыяй у гэтай краіне.
Аляксандр Лукашэнка адгарадзіўся ад свету і Літвы, каб ніхто не даведаўся, што адбываецца ў краіне»,— пракаментавала Ланкінінкайтэ.
Яна адзначыла, што працуе ў Беларусі прыблізна шэсць гадоў. Штогод год яна і аператар Ёнас Грышконіс атрымлівалі службовыя візы і гадавыя акрэдытацыі, якія дазваляюць наведваць Беларусь. «Напэўна, мы адзіныя паведамлялі пра тое, што адбываецца ў гэтай краіне. Не раз нас затрымлівалі, нас білі, і камеру разбівалі», — сказала журналістка.
Ланкінінкайтэ выказала меркаванне, што чашу цярпення беларускіх службаў бяспекі перапоўнілі апошнія мітынгі, на якіх прысутнічала іх здымачная група.
Як паведаміў БелаПАН кіраўнік аддзела па сувязях з прэсай і грамадскасцю Міністэрства замежных спраў Літвы Міндаўгас Лашас, для растлумачэнняў у сувязі з інцыдэнтам у МЗС выкліканы Уладзімір Дражын, пасол Беларусі ў Вільнюсе. Чакаецца, што сустрэча з ім адбудзецца найбліжэйшым часам.
Каментары