Расійскія эксперты апазналі абвінавачанага па справе аб выбуху ў мінскім метро Дзмітрыя Канавалава на відэакадрах камер вонкавага назірання ў мінскім метро 10 і 11 красавіка. Аб гэтым стала вядома падчас судовага пасяджэння 26 верасня.
Для апазнання з Канавалавым былі праведзеныя некаторыя следчыя дзеянні. У прыватнасці, яго пераапранулі ў тое ж адзенне, у якім ён быў 10 і 11 красавіка, і папрасілі прайсці па тых маршрутах, па якіх ён хадзіў у дзень прыезду ў Мінску 10 красавіка і пры ўчыненні тэракта 11 красавіка. Яго дзеянні фіксаваліся на камеру, пасля чаго вынятыя кадры з Канавалавым 10 і 11 красавіка, а таксама кадры следчых дзеянняў былі адпраўленыя для экспертызы ў Федэральную службу бяспекі ў Маскву. Расійскія эксперты ўстанавілі, што на кадрах ад 11 красавіка чалавек, які закладваў бомбу на станцыі метро «Кастрычніцкая», апрануты гэтак жа, як і Канавалаў падчас следчых дзеянняў.
Партрэтнае падабенства, паводле заключэння расійскіх экспертаў, устанавіць не ўдалося.Што да відэазапісу 10 красавіка, то яны адзначылі, што на кадрах метрапалітэна ёсць партрэтнае падабенства з Канавалавым. У першым выпадку, калі ён ехаў у метро на арандаваную кватэру, падабенства нязначнае; у другім выпадку, калі ён ехаў выбіраць месца для закладкі выбуховай прылады, падабенства «сярэдняе». Таксама эксперты адзначылі адпаведнасць асаблівасцям знешняга выгляду адзення Канавалава са здымкамі, зробленымі камерамі відэаназірання 10 красавіка.
Цяпер у судзе зачытваюць пратаколы следчых дзеянняў з удзелам Канавалава, у прыватнасці рэканструкцыю яго руху 11 красавіка 2011 года. У гэтых пратаколах Канавалаў падрабязна расказвае пра свой маршрут руху і паказвае яго на мясцовасці.
Цяпер чытаюць
Максім Знак: Мы з Ціханоўскай зайшлі падаваць скаргу ў кабінет Ярмошынай — але Ярмошынай там не было43
Каментары