Стэфановіч: У справе Бяляцкага шмат дакументаў, здабытых непрацэсуальным шляхам
4 лістапада ў Мінску працягваецца судовы працэс над праваабаронцам Алесем Бяляцкім. Напярэдадні былі дапытаны сведкі, сёння даследуюцца матэрыялы крымінальнай справы.
У перапынку пасяджэння ход працэсу пракаментаваў калега Бяляцкага праваабаронца Валянцін Стэфановіч: «Доказная база абвінавачання, мне падаецца, досыць слабая. У матэрыялах справы шмат дакументаў, якія былі здабытыя не дэпартаментам фінансавых расследаванняў (ДФР), а Камітэтам дзяржаўнай бяспекі, непрацэсуальным шляхам. Гэта фотакопіі нейкіх папераў, неперакладзеныя дакументы, якія былі зняты нейкім чынам з камп’ютара. Сярод дакументаў ДФР, з якімі працавалі падчас следства, шмат што не перакладзена належным чынам. Ну, і паказанні ўчорашніх сведкаў — прадстаўнікоў падатковай інспекцыі — таксама не ўпэўнілі мяне, што ёсць рацыя ў следства, што падатак мусіў быць выплачаны з гэтай сумы».
На думку Стэфановіча, пра палітычны характар справы сведчаць, напрыклад, зачытаныя інфармацыйныя лісты за подпісам старшыні КДБ Зайцава кіраўніку Камітэта дзяржкантролю. «Там напісана канкрэтна, — гаворыць праваабаронца, — Алесь Бяляцкі, Валянцін Стэфановіч атрымлівалі сродкі на незаконную дзейнасць у Рэспубліцы Беларусь і г.д. Гэта яшчэ раз падкрэслівае палітычны характар гэтай справы, і таму рашэнне суда тут будзе не юрыдычнае, а палітычнае».
Паводле слоў Стэфановіча, у сённяшняй сітуацыі ў Беларусі праваабаронцы вымушаны працаваць у такім напаўпадпольным становішчы. «Тое, што адбылося з Алесем, — кажа ён, — гэта працяг той скіраванай сістэматычнай палітыкі ўладаў у дачыненні да грамадскіх арганізацыяў. Спробы маргіналізацыі праваабарончых арганізацый, выпіхванне іх у нелегальнае поле праз пазбаўленне рэгістрацыі, адмаўленне ў рэгістрацыі. З 2003 года ў Беларусі не зарэгістравана ніводнай праваабарончай арганізацыі».
«Я спадзяюся, што Алесь хутка будзе з намі, — гаворыць Стэфановіч. — Але нават калі яго ізалююць, наша дзейнасць будзе працягвацца. Спробы ўладаў знішчыць праваабарончы цэнтр «Вясна» пакуль што не мелі і не будуць мець поспеху».
Цяпер чытаюць
Што за Дзмітрый Скіндзераў, які абвясціў вайну Ціханоўскай? Супрацоўніцтва з ГУБАЗіКам, даўгі ў Беларусі, даўгі ў Літве44
Каментары