Малодшаму з групы нядаўна споўнілася 16, старэйшаму — 17.
У Воранаўскім раёне міліцыя затрымала трох школьнікаў адной з мясцовых школ, паведамляе прэс-служба УУС Гродзенскага аблвыканкама. Малодшаму з групы нядаўна споўнілася 16, старэйшаму — 17. Іх падазраюць у крадзяжы аўто. Усе трое мелі старыя савецкія легкавікі, але марылі ездзіць на нямецкіх. Паколькі ў бацькоў аднаго з іх была Audi-80 і хлопец быў добра знаёмы з гэтым аўто, вырашылі засяродзіць увагу менавіта на гэтай мадэлі.
Па інфармацыі міліцыі, маладыя людзі дзейнічалі па адной схеме: выкрадалі аўто, каталіся на ім, потым забіралі з легкавіка ўсё, што трапляла пад руку і кідалі легкавік, дзе заманецца.
Скончылася ўсё тым, што ўчастковы Воранаўскага райаддзела міліцыі атрымаў тэлефанаванне ад памежнікаў, якія заўважылі каля лесу падазроны аўтамабіль. Міліцыянт выехаў на месца, выявіў у машыне няспраўнасць, пасля чаго вярнуўся ў райаддзел, каб высветліць асобу ўласніка. Калі вярнуўся да легкавіка, то яго ўжо адбуксіравалі.
Участковаму спатрэбілася некалькі гадзін, каб выявіць падазраваных. Усе трое на дадзены момант знаходзяцца пад вартай.
Каментары