20‑гадовы мінчук спачатку аддаў ашуканцам свае грошы, а потым выкапаў са снегу чужыя
У міліцыю звярнуўся мінскі студэнт, які стаў ахвярай і кур’ерам тэлефонных ашуканцаў. Ён страціў свае грошы, але выратаваў ашчадак сталічнай пенсіянеркі і ашуканай жыхаркі Гродна, а таксама пазбег крымінальнай адказнасці.
Маладога чалавека ашукалі па схеме «Энергасбыт». Ён назваў чатырохзначны код з SMS, а потым паверыў, што ашуканцы адкрылі на яго імя злачынны рахунак у банку. Студэнт пагадзіўся задэклараваць свой ашчадак і перадаў 7 тысяч даляраў першакурсніцы сталічнага ВНУ, якую лічыў кур’ерам Нацбанка, паведамляе «Міліцыя Мінска».
18‑гадовую дзяўчыну ашукалі па той жа схеме і прымусілі забраць 5 тысяч даляраў у яшчэ аднаго мінчука — 87‑гадовага пенсіянера. Усю суму яна на таксі даставіла наступнаму кур’еру, думаючы, што зарабляе добрую характарыстыку ад КДБ.
У той жа час ашуканаму студэнту патэлефанаваў яшчэ адзін незнаёмы чалавек, які запатрабаваў выканаць яшчэ некалькі заданняў. Мінчук паехаў ва ўмоўленае месца і забраў са схованкі ў снезе 8 тысяч еўра, а потым на вакзале — яшчэ 8 тысяч даляраў. Гэтыя грошы належалі 70‑гадовай мінчанцы і 21‑гадовай жыхарцы Гродна, якія таксама паверылі ашуканцам і лічылі, што грошы дэкларуюцца.
На ўказанне куратараў студэнт павінен быў перадаць наяўныя наступнаму кур’еру. Але ён западозрыў абман і звярнуўся ў міліцыю, дзе яго падазрэнні пацвердзілі. Грошы канфіскаваныя і будуць вернутыя пацярпелым.
Распачаты крымінальныя справы за ашуканства.
Цяпер чытаюць
Мама Бажэны Ярэміч, якая рыхтуе прыгажунь для Лукашэнкі, купіла элітны катэдж коштам $837 тысяч25
Каментары