На гомельскім вінзаводзе адбылася ўцечка сярністага ангідрыду 1

Як паведаміла прэс-служба МНС Беларусі, інфармацыя аб гэтым здарэнні паступіла ратавальнікам 26 чэрвеня ў 19.51. Праз пяць хвілін першыя падраздзяленні ўжо былі на месцы. Высветлілася, што з транспартнага металічнага балона ёмістасцю 250 літраў адбываецца выпарэнне пароў сярністага ангідрыду. Балон знаходзіўся на адкрытай пляцоўцы захоўвання тары на тэрыторыі прадпрыемства і быў запоўнены сярністым ангідрыдам на 10% (25 літраў). Уцечка адбывалася з адтуліны дыяметрам 5 мм, што ўтварылася ўверсе балона каля запорнага вентылю. Работнікамі МНС адтуліна была заглушана спецыяльным прыстасаваннем.

Для прадухілення магчымага распаўсюджання рэчыва ратавальнікі стварылі гэтак званую вадзяную завесу. Для страўлівання сярністага ангідрыду балон змясцілі ў каркасную ёмістасць. Яе напоўнілі вадой, дабавілі едкі натрый і адкрылі вентыль. Сярністы ангідрыд пры праходжанні цераз ваду стварае соль, якую можна без усякіх абмежаванняў утылізаваць, патлумачылі ў прэс-службе МНС.

У выніку інцыдэнту ніхто не пацярпеў, тэхналагічны працэс не парушаўся.

У момант узнікнення НЗ на тэрыторыі прадпрыемства знаходзіліся тры чалавекі, якія да прыбыцця падраздзяленняў МНС самастойна яе пакінулі. Найбольш верагодная прычына здарэння — карозія металу транспартнага балона.

Сярністы ангідрыд (серы двувокіс, аксід серы (IV) SO2) — бясколерны газ з вострым пахам, таксічны. Пры ўдыханні аэразоль выклікае раздражненне слізістай абалонкі дыхальных шляхоў. Штогод у атмасферу выкідваюцца дзясяткі мільёнаў тон сярністага ангідрыду, які ўтвараецца пры прамысловым спальванні вугалёў і нафты, што ўтрымліваюць злучэнні серы.

БелаПАН

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ