Ад каравая ў Расіі да кайданкоў у Маямі: за сэксуальны гвалт арыштаваныя скандальныя браты Тэйт
Вядомыя блогеры Эндру і Трыстан Тэйт, якія яшчэ месяц таму былі ганаровымі гасцямі ў Расіі, арыштаваныя ў амерыканскім Маямі. Арышт адбыўся па запыце Лондана ў межах крымінальнай справы аб сэксуальных злачынствах і гандлі людзьмі.
Брытанскі бок запытаў у ЗША экстрадыцыю братоў. Новая справа грунтуецца на заявах сямі пацярпелых і ўключае цэлы шэраг цяжкіх артыкулаў.
Так, 39‑гадоваму Эндру Тэйту высунуты абвінавачанні ў згвалтаванні, гандлі людзьмі, нанясенні пашкоджанняў і распаўсюдзе парнаграфіі з удзелам непаўналетніх. Яго малодшаму брату Трыстану інкрымінуюць згвалтаванні і гандаль людзьмі з мэтай сэксуальнай эксплуатацыі.
Акрамя Вялікабрытаніі, да братоў Тэйт маюць сур'ёзныя прэтэнзіі праваахоўнікі яшчэ дзвюх краін. У Румыніі з 2022 года разгортваецца асноўны судовы працэс. Братоў абвінавачваюць у стварэнні злачыннай групоўкі для гандлю людзьмі і сэксуальнай эксплуатацыі жанчын.
У 2025 годзе генеральны пракурор штата Фларыда таксама пачаў расследаванне супраць блогераў пасля звароту адной з ахвяр.
Арышт у ЗША адбыўся на фоне нядаўняга гучнага візіту братоў Тэйт у Расію ў чэрвені. Тады блогеры сталі аднымі з самых прыкметных гасцей Пецярбургскага міжнароднага эканамічнага форуму.
У расійскім аэрапорце скандальных інфлюэнсераў сустракалі з караваем, народнымі танцамі і песняй «Матушка».
Падчас турнэ Эндру Тэйт паспеў пастраляць з танка пад «Кацюшу» на палігоне.
Незалежныя аналітыкі адзначаюць, што запрашэнне такіх фігур на буйныя дзяржаўныя мерапрыемствы цалкам укладваецца ў стратэгію Масквы па пашырэнні свайго інфармацыйнага ўплыву. Крэмль ужо не першы год спрабуе ўзмацніць сваю мяккую сілу на Захадзе праз працу з лаяльнымі замежнымі блогерамі, актывістамі, гатовымі трансляваць патрэбныя наратывы ў абмен на кантэнт і фінансаванне.
Эндру Тэйт — былы прафесійны кікбаксёр, які зарабіў мільённую аўдыторыю на роліках пра багатае жыццё, дарагія аўто і «мужчынскі поспех». Ён вядомы агрэсіўнымі, сэксісцкімі і мізагіннымі выказваннямі.
Цяпер чытаюць
З псіхбальніцы збег былы начальнік Ганцавіцкай міліцыі14
Каментары