Тры нафтабазы, папярэдне, гараць у Стаўрапалі і яго ваколіцах пасля ўкраінскай начной атакі
У ноч на 19 ліпеня Стаўрапаль і яго ваколіцы падвергліся маштабнай атацы ўкраінскіх беспілотнікаў. Паводле звестак OSINT-аналізу выдання ASTRA, пад ударам апынуліся адразу тры мясцовыя нафтабазы, што прывяло да сур'ёзных пажараў і ўвядзення рэжыму надзвычайнай сітуацыі.
Мясцовыя ўлады афіцыйна пацвердзілі тры ачагі ўзгарання ў дзвюх прамысловых зонах каля горада. На аснове відэазапісаў відавочцаў OSINT-даследчыкі лакалізавалі пункты паражэння.
На хутары Вязнікі зафіксаваны пажар на буйной нафтабазе «Раснафты». Яшчэ адзін ачаг пажару ў гэтай жа прамзоне, імаверна, узнік па адрасе вул. Прамысловая, 1, дзе знаходзяцца базы кампаній ТАА «Карона» і ТАА «МК-Нафтапрадукт».
Таксама, як вынікае ў відэа, загарэлася Стаўрапальская нафтабаза (вул. Каламійцава, 19), якая належыць ТАА «ЛУКОЙЛ-Югнафтапрадукт». Гэта магутны стратэгічны аб'ект, які налічвае 42 рэзервуары агульным аб’ёмам каля 57,6 тысячы кубічных метраў. База забяспечвае прыём, захоўванне і размеркаванне бензіну, дызельнага паліва і масел.
У сувязі з маштабам пажараў у прамзонах улады ўвялі рэжым НС мясцовага ўзроўню.
Гэтая атака стала працягам планамернага знішчэння нафтавай інфраструктуры рэгіёна. Нафтабазы пад Стаўрапалем атакуюцца ўжо трэці раз за месяц.
Па падазрэнні ў забойстве цяжарнай мінчанкі затрымалі хакейнага суддзю Аляксея Гаўрылёнка6
Каментары