Бек і Зінгерыс назвалі выбары «фарсам» і «чарговым этапам заняволення беларусаў»
Марылуіза Бек і Эмануэліс Зінгерыс, якіх не пусцілі ў Беларусь для назірання за парламенцкімі выбарамі, далі выбарчай кампаніі сваю ацэнку.
Дэпутат бундэстага Марылуіза Бек назвала беларускія выбары «фарсам». «Дэмакратычныя стандарты былі парушаныя яшчэ на перадвыбарным этапе», — гаворыцца ў яе заяве. Дэпутат, у прыватнасці, зазначае, што прадстаўнікі апазіцыі практычна не дапускаліся ў склад выбарчых камісій, у сувязі з чым незалежны кантроль падліку галасоў стаў немагчымым. Апрача таго, падкрэслівае Бек, на апазіцыйных кандыдатаў у дэпутаты рабіўся націск, затрымліваліся грамадскія актывісты.
Нямецкі дэпутат упэўненая, што пяцідзённае датэрміновае галасаванне «адкрыла ўсе магчымасці для маніпуляцый».«Па вядомай традыцыі, усіх студэнтаў, якія жывуць у інтэрнатах, і рабочыя калектывы прымушалі да датэрміновага галасавання. Гэта рабілася для таго, каб прадухіліць яўку ніжэйшую за 50%, пры якой лічыцца, што выбары не адбыліся», — сказана ў заяве.
Разам з тым, зазначае дэпутат, актыўнасць беларускіх выбаршчыкаў была «нізкай як ніколі». «Жорсткі разгон апазіцыі і эканамічны крызіс моцна нашкодзілі рэжыму. Апрача таго, канстытуцыйны пераварот Лукашэнкі ў 1996 годзе пазбавіў парламент усякай улады. Да выбараў марыянетачнага парламента, які толькі і можа, што пагаджацца з Лукашэнкам, вельмі мала цікавасці. Таму рэжым вельмі нервова рэагуе на заклікі да байкоту выбараў і ўводзіць на яго самыя жорсткія санкцыі», — мяркуе Бек.
«Найбольш эфектыўным інструментам для гэтага стала б адмена віз, таму што праз абмен непасрэднага вопыту дэмакратычных супольнасцяў Еўропы мы можам эфектыўна садзейнічаць развіццю грамадства ў Беларусі», — гаворыцца ў заяве.Яна падкрэслівае, што грамадзянская супольнасць Беларусі, якая пакутуе ад рэпрэсій, мае патрэбу ў падтрымцы з боку Еўрасаюза.
У сваю чаргу кіраўнік камітэта па замежных справах сейма Літвы Эмануэліс Зінгерыс назваў парламенцкія выбары ў Беларусі «чарговым этапам заняволення беларусаў».
«Легітымныя выбары пры вызваленні ўсіх палітзняволеных і далучэнні ўсёй беларускай грамадскасці да выбарчага працэсу адкрылі б магчымасці для многіх таленавітых беларусаў, чый патэнцыял зараз замкнёны, накіраваць сваю энергію на вырашэнне розных важных для Беларусі праблем і пад’ёму канкурэнтаздольнасці беларускай нацыі ў сучасным свеце», — сказаў ён у інтэрв’ю «Радыё Свабода».
Зінгерыс заклікаў беларускія ўлады выпусціць на волю палітзняволеных, каб «вызваліць сапраўдны патэнцыял беларускага народа, сапраўдныя таленты, якія маглі б рэалізаваць дэмакратычную свабодную будучыню Беларусі».
Як раней паведамлялася, Марылуіза Бек і Эмануэліс Зінгерыс планавалі ў складзе місіі кароткатэрміновых назіральнікаў ПА АБСЕ прыбыць у Беларусь для назірання за ходам выбараў. Аднак беларускія ўлады адмовілі ім у візе. Пры гэтым у МЗС сцвярджалі, што адмова ў візах не звязана з назіраннем за выбарамі. «Гэтыя два грамадзяніны з’яўляюцца іншаземцамі, уезд якіх на тэрыторыю Рэспублікі Беларусь разглядаецца як непажаданы», — заявіў
Каментары