Каменныя страсьці
У той дзень, калі бізнэсоўца з Сургуту Анатоля Сілівончыка арыштавалі за налёт ягоных гадаванцаў на Мікалаеўку, яго чакалі ў майстэрні менскага скульптара Аляксандра Шомава: ён зьбіраўся прафінансаваць усталяваньне ў Полацку помніка асьветніцы Эўфрасіньні.
Шомаўская Эўфрасіньня мела шанец паўстаць у Полацку яшчэ ў 1995 годзе. Мясцовыя бізнэсоўцы, якія займаліся нафтаю, давалі грошы на помнік. Што зашкодзіла рэалізавацца праекту? Супраць быў тагачасны намесьнік старшыні гарвыканкаму Аляксандар Камароў, які падтрымліваў праект маладой скульптаркі Натальлі Аліок.
У былых фундатараў з прыходам Лукашэнкі нафтавы бізнэс ляснуўся. І Шомаў зьвярнуўся да Сілівончыка. Але Сілівончыку цяпер даводзіцца фінансаваць рамонтныя працы ў гомельскай турме. Такім чынам, Шомаву двойчы не пашанцавала.
Аднак сёлета пытаньне пра помнік Эўфрасіньні зноў актуалізавалася. У Полацкім гарвыканкаме адбыўся разгляд зусім новага праекту, які прадставіў менскі скульптар Ігар Голубеў. Дарэчы, нядаўна ў Менску ў двары ўнівэрсытэту паставілі помнік полацкай асьветніцы ягонага ж аўтарства. Малады скульптар па гарачых сьлядох выканаў яшчэ адзін праект — ужо для Полацку, з ухвалаю мітрапаліта Філарэта: каноны праваслаўнай царквы скульптар у сваёй працы не парушыў. Прывез ён і грошы на помнік. Ад гарадзкіх уладаў патрабавалася толькі зрабіць добраўпарадкаваньне тэрыторыі. На такі варыянт улады згадзіліся хутка (бо сёлета трэба адзначаць 2000-я ўгодкі хрысьціянства). Праўда, у сяброў створанага з гэтай нагоды аргкамітэту ўзьніклі заўвагі — палачане папрасілі паменшыць на славутай зямлячцы колькасьць крыжоў і прыбраць німб з галавы.
Помнік хочуць паставіць да сярэдзіны траўня і такім чынам пасьпець да афіцыйных урачыстасьцяў.
У той самы час у суседнім Наваполацку старшыня гарвыканкаму Аляксандар Камароў, былы полацкі віцэ-мэр, сказаў на прэс-канфэрэнцыі, што горад зьбіраецца ўсталяваць чыгунны помнік заснавальнікам юнага гораду. У Полацку і Наваполацку шмат прыхільнікаў аб’яднаньня двух местаў. Таму ў журналістаў адразу паўстала пытаньне: у які гістарычны кантэкст патрапіць камароўскі помнік пасьля аб’яднаньня? Стане манумэнтам заснавальнікам некалькіх мікрараёнаў?
Васіль Кроква
Цяпер чытаюць
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў35
«Астравок Паўночнай Карэі». Баранавіцкая школа выкаціла спіс патрабаванняў да выгляду вучняў
Містычнае кола Вільні: Каліноўскі быў пахаваны з медальёнам святыні, каля якой вырас гатычны палац доктара з-пад Оршы. Цяпер парэшткі Каліноўскага перапахавалі ў магільні таго ж доктара1515
Каментары