На тыдні
Неадольнае жаданьне быць сацыял-дэмакратам
Жаночая партыя “Надзея” Палевіковай, сацыял-дэмакраты Караля й “Грамада” Шушкевіча, якія прызначылі на 24 жніўня свой аб’яднаўчы зьезд, сутыкаюцца з хітрыкамі ўладаў і калегаў з “Народнай грамады”. Тры лідэры заявілі пра гэта на спэцыяльнай прэсавай канфэрэнцыі. Валянціна Палевікова выявіла, што прадстаўнікі ФПБ і сябры “Народнай грамады” езьдзяць па рэгіёнах і ўгаворваюць сяброў “Надзеі” правесьці 17 жніўня альтэрнатыўны сход, каб перашкодзіць аб’яднаньню. Дзіўна, чаму ўсім так хочацца быць сацыял-дэмакратамі, калі папулярнасьць Жаночай партыі перавышае рэйтынг усіх сацыял-дэмакратычных разам узятых?
10 мільёнаў на дэмакратыю
ЗША штогод выдзяляюць да 10 млн. даляраў на падтрымку дэмакратычных пераўтварэньняў у Беларусі, — дэкляраваў намесьнік памочніка дзяржсакратара ЗША Стывэн Пайфэр карэспандэнту БелаПАН. Тыя краіны, якія крочаць па шляху дэмакратызацыі і рэформаў больш упэўнена, атрымліваюць нашмат большую дапамогу, зазначыў ён.
Германовіч замест Старыкевіча
Доўгая гісторыя са звальненьнем А.Старыкевіча з пасады рэдактара “Беларускага часу” скончылася валявым рашэньнем Л.Козіка. Ён зьняў рэдактара, пазыцыя якога яму не падабалася, бяз згоды на тое прэзыдыюму ФПБ. В.а. галоўнага рэдактара стала Ірына Германовіч, якая цяпер працуе намесьнікам галоўнага рэдактара, а раней кіравала газэтай. Народны паэт Беларусі Генадзь Бураўкін адмовіўся заставацца сябрам рэдкалегіі, пратэстуючы супраць звальненьня А.Старыкевіча.
ВВП вырас на 5,7%
Афіцыйная статыстыка адзначае далейшае паскарэньне тэмпаў росту ВВП. За першыя сем месяцаў году ён вырас на 5,7% проці мінулага году. Тэмпы росту за 6 месяцаў ацэньваліся толькі ў 4,7%. Паскарэньне адбылося дзякуючы таму, што раней, чым летась, сабралі збожжа. Мяркуецца, што па выніках году лічба будзе трохі ніжэйшай.
Баі ў Чачэніі
У суседняй Расеі працягваецца вайна. 22 вайскоўцы загінулі за мінулы тыдзень у Чачэніі. Усяго з пачатку другое чачэнскае вайны загінулі 4302 расейскія вайскоўцы і міліцыянты, 12417 байцоў параненыя. Таксама загінула ня менш за 15 тыс. чачэнскіх партызанаў і мірных жыхароў.
АБВ
У менскім мэтро нярэдка зьяўляюцца беларускамоўныя рэклямкі культурных і інфармацыйных прадуктаў, сацыяльная рэкляма. А вось сетка крамаў рэклямавала сябе па-беларуску ўпершыню. Піянэрам стала “АБВ” — мярэжа магазынаў “Беллегпраму” ў сталіцы. Беларусізаваў рэкляму сваіх мабільнікаў “Самсунг”. Нацыянальную карту разыгрывае і “Вэлкам” у піку “МТС”. Пакуль, аднак, не зусім слушна.
пацярпелыя за Беларусь
Штрафамі па 100 тыс. рублёў былі пакараныя 2 жніўня гарадзенскія журналісты Андрэй Пачобут, Ірына Чарняўка і Андрэй Пісальнік “за незаконнае знаходжаньне ў памежнай зоне”. Журналісты прыехалі ў Бераставіцкі раён, каб асьвятляць разбурэньне царквы, пабудаванай Іванам Спасюком. Іх трымалі ў пастарунку ўсю ноч, а ўраньні аштрафавалі. 7 жніўня гарадзенская судзьдзя Натальля Козел дала актывістцы “Маладой грамады” Сьвятлане Нех 10 ночаў адміністрацыйнага арышту за ўдзел у “Ланцугу неабыякавых людзей”, які адбыўся 8 ліпеня. С.Нех трымае галадоўку пратэсту ў вязьніцы. 11 жніўня, падчас акцыі барысаўскай філіі “Зубра”, скіраванай у абарону недзяржаўнай прэсы, міліцыянты паспрабавалі затрымаць Ігара Закрэўскага. Але заступіліся “зуброўцы” ды карэспандэнт радыё “Свабода” Алесь Мікалайчанка, і міліцыянты адпусьцілі хлопца.
