Аляксандар Фядута. Тыя ж. Бяз Мэган Фіцджэральд

спэцыяльна для “НН”

Тыя ж. Бяз Мэган Фіцджэральд

Адмова ў візе апошняй супрацоўніцы КНГ АБСЭ, якая прадстаўляла ў гэтай арганізацыі эўраатлянтычную супольнасьць, прадэманстравала, што беларускія ўлады па-ранейшаму ня здольныя на гульню. Наагул — ні на якую гульню, бо дагэтуль яны дзейнічалі выключна ломам і фінкай, як і належыць нармальнаму бандыту з Брынскіх лясоў, — выганялі са сваіх пушчаў і балотаў усіх прыхадняў, незалежна ад аргумэнтаў, якімі тыя спрабавалі абгрунтоўваць сваё права прысутнічаць у нашай краіне.

Адмова ў працягу візы спн.Мэган Фіцджэральд была папросту бессэнсоўнай. Гэтая маладая прывабная паненка — амэрыканка, але больш ніякіх адмоўных з гледзішча беларускае ўлады якасьцяў яна не дэманстравала. За тыдзень да адмовы яна з сумам сказала мне: “Я ж разумею, калі гэта адбудзецца, дык зусім не таму, што я такая важная пэрсона”. Мелася на ўвазе, што яе выкінуць зь Беларусі па інэрцыі. Так усё і адбылося. Думаю, прэзыдэнту пра такое рашэньне маглі і не дакладаць: у яго сёньня спраў і так хапае, няма чаго за нашае дыпляматычнае хамства адказнасьць на ягоныя плечы перакладаць. Бо нашым замежнапалітычным ведамствам і без таго ўпэўнена кіруюць дыпляматы, якія валодаюць тонкасьцю пітэкантрапаў і вытанчанасьцю дубаломаў.

Наяўнасьць у Менску апошняга заходняга супрацоўніка КНГ адкрывала перад беларускім МЗС шырокае поле для гандлю з Захадам. Тым больш — вялося пра амэрыканскую грамадзянку, якая безь пяці хвілінаў як выходзіла замуж за грамадзяніна Беларусі. Я пэўны, што шлюб міс Фіцджэральд адбудзецца нягледзячы на ўсе намаганьні спадара Сhvаstoff’а. Але нам ад гэтага не лягчэй. Гэтая мілая паненка магла сьпісаць у вачах Захаду ўсё. Вось як Пуцін, уступіўшы ў антытэрарыстычную кааліцыю, прадэманстраваў, што Расея з “імпэрыі зла” ператварылася ў зразумелага і цалкам таварыскага мядзьведзя, які танчыць яшчэ не навучыўся, але на людзей ужо ня кідаецца. Так і мы — схаваліся б за амэрыканку. Не, маглі сказаць мы, гэта ўсё Вік папутаў, гэта ад прасякнутых ягоным атрутным духам супрацоўнікаў мы пазбаўляліся. А Мэган зь ім не працавала, таму няхай сядзіць у Менску і спакойна рыхтуецца да вясельля. А наўзамен, калі ласка, усё ж перагледзьце мандат гэтай вашай КНГ.

Цяпер ніхто мандат пераглядаць ня будзе. Яго перагледзелі б, каб хоць які крок зь беларускага боку дэманстраваў наяўнасьць добрай волі ў афіцыйнага Менску. Цяпер, нават калі галава беларускага МЗС на сустрэчы ў Нью-Ёрку з партугальскім калегам (ён жа — старшыня АБСЭ) прачытае лекцыю аб тым, як мы тут будуем дэмакратычную дзяржаву, — не павераць. Няма як схавацца і за сьпіну Расеі. Тамтэйшае кіраўніцтва ўжо выказалася вуснамі сп.Сванідзэ, як яно будзе дзейнічаць. Для тых, хто забыўся, нагадаю: Сванідзэ з шчырасьцю нашчадка старых бальшавікоў (ён жа з тых самых Сванідзэ, сталінскіх сваякоў) заявіў: Расея стамілася ад таго, што экстравагантны саюзьнік увесь час псуе ёй рэпутацыю. А ўлічыўшы, што галасаваньне ў АБСЭ ідзе па формуле “аднагалосна мінус адзін”, мы гэтым “мінус адзін” якраз можам і аказацца. Тым больш, налета старшыняваць у АБСЭ будуць галяндцы, якія лёгка могуць паставіць пытаньне аб прыпыненьні сяброўства Рэспублікі Беларусі ў арганізацыі з-за невыкананьня стамбульскай рэзалюцыі. За ўсю гісторыю АБСЭ такую меру выкарыстоўвалі толькі да Югаславіі. І мы ведаем, чым для Югаславіі гэтая мера скончылася.

Цікава, дзе менавіта спадар Сhvаstoff прапануе кіраўніку нашай очань гордай дзяржавы шукаць другі голас? У дзяржавах СНД? Але ж сам Аляксандар Рыгоравіч у панядзелак у жывым этэры НТВ фактычна абразіў СНД: прыгадайце ягоны выпад з нагоды аморфнасьці гэтай арганізацыі і г.д. Варта ўлічыць і тое, што апошнім адказным супрацоўнікам КНГ зьяўляецца якраз грамадзянка адной зь дзяржаў СНД — малдаванка Аліна Жасан. І ў спадарыні Жасан акрэдытацыя сканчаецца ў кастрычніку. Гэта для ЗША Мэган Фіцджэральд была толькі пясчынкай у дыпляматычным моры, а дэ-факта кіраўнік КНГ АБСЭ грамадзянка Малдовы Аліна Жасан падвышае ранг сваёй краіны ў вачах усёй Эўропы.

Пасьля высылкі спадарыні Жасан разьлічваць на голас малдаўскай дэлегацыі ў Вэне не давядзецца.

Наперадзе ў нас доўгія й цяжкія перамовы з Расеяй, дзе трэба сапраўдная дыпляматыя. Чым меней нітачак лучыць нас з астатнім сьветам, тым болей шанцаў з размаху выканаць мару сп.Ярашука і ўляцець-такі ў склад Расейскай Фэдэрацыі. Цікава, Ярашук з Сhvаstoff’ым кансультаваліся ці не? І чаму ім абодвум так не падабаецца беларускі сувэрэнітэт? І няўжо беларускаму МЗС выгодней апынуцца ў поўнай ізаляцыі, чым прыадчыніць для сябе фортку на Захад, каб хоць голас было чуваць. І потым: калі вы так ня любіце амэрыканцаў, няўжо вы ня здольныя зразумець, што выгнаньне КНГ АБСЭ толькі ўзмоцніць іх пазыцыі па беларускім пытаньні?

Я шчыра зайздрошчу Мэган Фіцджэральд. Вельмі хутка яна пазбавіцца ад непрыемнага абавязку бачыць і беларускія ўлады, і беларускую апазыцыю. Адзіны беларус, які зь ёй застанецца, будзе любіць яе шчыра, як толькі могуць любіць сапраўдныя беларускія мужчыны. Дарэчы, а спадар Сhvаstoff, ён — беларус?

Аляксандар Фядута