Прэміі на сьвята

Маладая пісьменьніца Аксана Бязьлепкіна стала ляўрэаткай першай «суб’ектыўнай літаратурнай прэміі». Менавіта так называе прэмію яе заснавальнік — Адам Глёбус.

Уганараваная Аксана за літаратуразнаўчае дасьледаваньне «Разам і паасобку. Таварыства «Тутэйшыя» («Беларускі кнігазбор», 2003). Узнагароджаньне пераможцы адбудзецца ў камэрнай абстаноўцы 25 сакавіка ў кавярні «Стары Менск».

Ідэя «Залатой літары» была агучаная на сайце Літара.net год таму. З аморфнай ідэі «найлепшай кнігі году» на апошнім этапе выкрышталізаваўся сьпіс намінантаў. У фінал выйшлі восем выданьняў: акадэмічная «Гісторыя беларускай літаратуры ХХ стагоддзя», дзьве кнігі Ўладзімера Арлова — «Адкусі галаву вароне» і «Краіна Беларусь» (у суаўтарстве зь Зьмітром Герасімовічам), дзьве анталёгіі — вершаваная «Краса і сіла» Міхася Скоблы і «Сучасная беларуская проза» Ўладзімера Сіўчыкава, а таксама кнігі Ганны Кісьліцынай «>blonde attack<», Вячаслава Рагойшы «На шляху да Парнасу» і згаданае дасьледаваньне А.Бязьлепкінай.

Чаму менавіта Бязьлепкіна? «Яна зрабіла першы калектыўны партрэт «Тутэйшых». І гэта навуковая праца, хай сабе студэнцкая», — адзначае Глёбус.

Толькі прэміі ПЭН-цэнтру ды «Гліняны Вялес», заснаваны Таварыствам вольных літаратараў, існуюць ужо працяглы час. Спробы заснаваньня прэміяў былі ў 90-я ва Ўладзімера Дамашэвіча ды ў часопісу «Arche». Ці надоўга хопіць імпэту «Залатой літары»? Глёбус кажа: «Калі і наважуся на працяг, дык хіба што буду даваць прэмію раз у два гады».

Адам Воршыч

Прэмія Багушэвіча

У той жа дзень, 25 сакавіка, Беларускі ПЭН-цэнтар уручыць сваю прэмію імя Францішка Багушэвіча. Гэтая ўзнагарода прызначаецца за творы гістарычнага жанру. Сёлета на яе быў толькі адзін прэтэндэнт, і камісія па прэміі прагаласавала за ягоную кандыдатуру аднагалосна. Гэта Захар Шыбека са сваім «Нарысам гісторыі Беларусі 1795—2002». Урачыстая цырымонія адбудзецца ў Гістарычных майстэрнях (вул.Сухая, 25; мэтро «Фрунзэнская») а 13-й гадзіне.

Прэмія «Залаты апостраф»

25 сакавіка ў Доме літаратара а 18.30 адбудзецца прэзэнтацыя 8-га нумару часопісу «Дзеяслоў» з удзелам Ніла Гілевіча, Генадзя Бураўкіна, Вольгі Іпатавай, Пятра Краўчанкі. Адначасова будуць уручаныя першыя прэміі «Дзеяслова» «Залаты апостраф» у галіне прозы, паэзіі, а таксама за найлепшы дэбют. Імёны ляўрэатаў трымаюцца ў сакрэце і стануць вядомыя толькі на вечарыне.

Тацяна Вабішчэвіч

• 0
• 0
• 0
• 0
• 0
• 0
• 0
• 0