Premii na śviata

Maładaja piśmieńnica Aksana Biaźlepkina stała laŭreatkaj pieršaj «subjektyŭnaj litaraturnaj premii». Mienavita tak nazyvaje premiju jaje zasnavalnik — Adam Hlobus.

Uhanaravanaja Aksana za litaraturaznaŭčaje daśledavańnie «Razam i paasobku. Tavarystva «Tutejšyja» («Biełaruski knihazbor», 2003). Uznaharodžańnie pieramožcy adbudziecca ŭ kamernaj abstanoŭcy 25 sakavika ŭ kaviarni «Stary Miensk».

Ideja «Załatoj litary» była ahučanaja na sajcie Litara.net hod tamu. Z amorfnaj idei «najlepšaj knihi hodu» na apošnim etapie vykryštalizavaŭsia śpis naminantaŭ. U finał vyjšli vosiem vydańniaŭ: akademičnaja «Historyja biełaruskaj litaratury XX stahodździa», dźvie knihi Ŭładzimiera Arłova — «Adkusi hałavu varonie» i «Kraina Biełaruś» (u suaŭtarstvie ź Źmitrom Hierasimovičam), dźvie antalohii — vieršavanaja «Krasa i siła» Michasia Skobły i «Sučasnaja biełaruskaja proza» Ŭładzimiera Siŭčykava, a taksama knihi Hanny Kiślicynaj «>blonde attack<», Viačasłava Rahojšy «Na šlachu da Parnasu» i zhadanaje daśledavańnie A.Biaźlepkinaj.

Čamu mienavita Biaźlepkina? «Jana zrabiła pieršy kalektyŭny partret «Tutejšych». I heta navukovaja praca, chaj sabie studenckaja», — adznačaje Hlobus.

Tolki premii PEN-centru dy «Hliniany Viales», zasnavany Tavarystvam volnych litarataraŭ, isnujuć užo praciahły čas. Sproby zasnavańnia premijaŭ byli ŭ 90-ja va Ŭładzimiera Damaševiča dy ŭ časopisu «Arche». Ci nadoŭha chopić impetu «Załatoj litary»? Hlobus kaža: «Kali i navažusia na praciah, dyk chiba što budu davać premiju raz u dva hady».

Adam Voršyč

Premija Bahuševiča

U toj ža dzień, 25 sakavika, Biełaruski PEN-centar uručyć svaju premiju imia Franciška Bahuševiča. Hetaja ŭznaharoda pryznačajecca za tvory histaryčnaha žanru. Sioleta na jaje byŭ tolki adzin pretendent, i kamisija pa premii prahałasavała za jahonuju kandydaturu adnahałosna. Heta Zachar Šybieka sa svaim «Narysam historyi Biełarusi 1795—2002». Uračystaja cyrymonija adbudziecca ŭ Histaryčnych majsterniach (vuł.Suchaja, 25; metro «Frunzenskaja») a 13-j hadzinie.

Premija «Załaty apostraf»

25 sakavika ŭ Domie litaratara a 18.30 adbudziecca prezentacyja 8-ha numaru časopisu «Dziejasłoŭ» z udziełam Niła Hileviča, Hienadzia Buraŭkina, Volhi Ipatavaj, Piatra Kraŭčanki. Adnačasova buduć uručanyja pieršyja premii «Dziejasłova» «Załaty apostraf» u halinie prozy, paezii, a taksama za najlepšy debiut. Imiony laŭreataŭ trymajucca ŭ sakrecie i stanuć viadomyja tolki na viečarynie.

Taciana Vabiščevič

• 0
• 0
• 0
• 0
• 0
• 0
• 0
• 0