Сайт Беларускай валютна-фондавай біржы (www.stock.bcse.by) паведаміў аб продажы 22 студзеня 100% акцый «Онербанка» за 5,1 млн. еўра.
15 млн. акцый рэалізавана па цане 125,89% ад наміналу. «Онербанк» быў зарэгістраваны як банк са 100-працэнтным іранскім капіталам. Яго заснавальнікамі сталі «Банк Рэфах Каргаран», «Банк Садэрат» і «Банк Тосее Садэрат». Статутны фонд новага банка быў сфарміраваны ў памеры 46,71 млрд. рублёў, што на дату дзяржаўнай рэгістрацыі складала ў эквіваленце больш як 11,5 млн. еўра.
Зарэгістраваныя ў Беларусі «Банк гандлёвы капітал» і «Онербанк» з іранскім капіталам (97 і 100% адпаведна) ужо паўтара года знаходзяцца пад санкцыямі ўрада ЗША.

3 жніўня 2010 года Міністэрства фінансаў ЗША ўнесла «Онербанк», а таксама «Банк гандлёвы капітал» у спіс кампаній, да якіх прымяняюцца аднабаковыя санкцыі, — з-за таго што яны кантралююцца іранскімі банкаўскімі структурамі. 23 студзеня 2012 года Мінфін ЗША ўвёў санкцыі ў дачыненні да іранскага банка «Тэджарат» (у перакладзе з фарсі «гандаль»), які валодае 97% акцый «Банка гандлёвы капітал» (даныя 2010 года).

22 студзеня на сайце Нацбанка з’явілася новая назва «Крэдэксбанка» — «Інтэрпэйбанк».
Мінфін ЗША 22 мая 2012 года выказаў сур’ёзную заклапочанасць адмываннем грошай «Крэдэксбанкам». Нацбанк правёў пазапланавую праверку гэтага банка і ў канцы чэрвеня паведаміў, што даныя Мінфіна не атрымалі пацвярджэння. Пакуль невядома, з чым звязана перанайменаванне банка.

Хочаш падзяліцца важнай інфармацыяй ананімна і канфідэнцыйна?