Што насамрэч знаходзіцца побач з курскім пляжам, на якім ад украінскіх дронаў пацярпелі людзі
У выніку атакі дронаў у Курску ў ноч на сераду загінулі трое чалавек. Кіраўнік вобласці Аляксандр Хінштэйн заявіў, што ўдар па гарадскім пляжы быў мэтанакіраваным і побач не было ваенных аб’ектаў. Аднак усяго ў 600 метрах ад месца выбуху знаходзіцца філіял навукова-даследчага інстытута Міністэрства абароны, што ставіць пад сумнеў афіцыйную версію, піша ASTRA.
Уначы ў сераду, 9 ліпеня, Курск атакавалі БПЛА. 3 чалавекі загінулі, у тым ліку супрацоўнік Расгвардыі, 7 параненыя, у тым ліку пяцігадовае дзіця. Усе яны знаходзіліся падчас налёту на гарадскім пляжы.
«Беспрэцэдэнтны па сваёй жорсткасці ўдар па мірным аб'екце. Улетку, у свята, у месцы, дзе нават блізка няма ваенных аб'ектаў. Дзе адпачывалі людзі разам з дзецьмі», — напісаў выконваючы абавязкі губернатара Хінштэйн.
«На тэрыторыі пляжу праводзяцца следчыя дзеянні, каб пацвердзіць факт тэрарыстычнага акту з боку УСУ, якія мэтанакіравана ўдарылі па адпачываючых», — дадаў пракрамлёўскі канал «Рэн-ТБ».
Аднак, як высветліла ASTRA, 8 ліпеня каля 23-й гадзіны над тэрыторыяй пляжа «Гарадскі» ў Курску БПЛА быў збіты сродкамі СПА МА РФ. На пляж упалі абломкі ўжо збітага беспілотніка, пацвердзілі крыніцы ASTRA. У выніку падзення абломкаў БПЛА былі параненыя, у тым ліку, Паліна Мінашкіна і яе пяцігадовы сын Антон.
Прыкладна ў 600 метрах ад пляжа «Гарадскі» ў Курску знаходзіцца філіял 18-га Цэнтральнага навукова-даследчага інстытута (ЦНДІ) Мінабароны Расіі, які займае тэрыторыю ў шэсць гектараў, заўважыла «Агенцтва».
18-ы ЦНДІ гістарычна займаўся распрацоўкай сістэм радыёразведкі, далёкай і спадарожнікавай сувязі і кадзіравання. Ён да гэтага часу займаецца вытворчасцю радыёлакацыйнай і радыёнавігацыйнай апаратуры, а таксама дзейнасцю, што забяспечвае ваенную бяспеку, вынікае з дадзеных «СПАРК-Інтэрфакс». Інстытут рэгіструе прыборы для радыётэхнікі, у тым ліку антэны для сістэм радыёманіторынгу, радыёпеленгацыі і радыёлакацыі, адзначае «Агенцтва».
Усяго над Курскай вобласцю ў ноч на 9 ліпеня збілі 23 БПЛА, паведамілі раніцай у МА РФ.
«Для беларускіх уладаў я, хутчэй, магчымасць, а не пагроза». Калеснікава дала вялікае інтэрв’ю Золатавай92
Каментары