Каля 15 тон камянёў у мінулую суботу было вывезена з тэрыторыі Парку мініяцюр замкаў і храмаў Вялікага Княства Літоўскага. Ва ўборцы парку ўзялі ўдзел каля 20 добраахвотнікаў з розных пратэстанцкіх цэркваў Мінска, Гродна, Брэста.
«Пры падрыхтоўцы тэрыторыі парку мы сутыкнуліся з сур'ёзнай праблемай - вялікая колькасць камянёў. Каб іх сабраць і вывезці нашым працоўным прыйшлося б выдаткаваць некалькі дзён, а валанцёры дапамаглі нам усё зрабіць літаральна за за 6 гадзін. Разам з валанцёрамі мы сабралі і завезлі 9 грузавікоў камянёў», - распавядае дырэктар фонду« Краіна замкаў» Алесь Варыкіш.
Па словах Варыкіша, на адной з экскурсій, дзе было шмат моладзі, ён жартам запрасіў юнакоў у валанцёрскі летнік, і яны адгукнуліся.
Для валанцёраў былі арганізаваныя харчаванне і начлег. У знак падзякі фонд «Краіна замкаў» правёў экскурсіі па навакольных выдатных мясцінах, у тым ліку ў Гальшанскі і Крэўскі замкі.
Алесь Варыкіш перакананы, што ў нас у краіне шмат неабыякавых людзей, гатовых дапамагчы ў праектах, якія рэкламуюць нашу гісторыю, нашы традыцыі. «Важна знайсці такіх людзей, заматываваць, падтрымаць, і можна рухаць горы», — падкрэсліў кіраўнік фонду «Краіна замкаў».
Пакуль гэта першы вопыт прыцягнення добраахвотнікаў да стварэння Парку мініяцюр. Першы, але не апошні. Дапамога валанцёраў спатрэбіцца яшчэ пры пракладанні сцяжынак і ўсталяванні агароджы вакол парку.
Нагадаем, у пачатку гэтага года фонд «Краіна замкаў» абвясціў аб стварэнні Парку мініяцюр замкаў і храмаў Вялікага Княства Літоўскага.
Гэтая ідэя была падтрыманая ў межах аднаго з праектаў ЕС/ПРААН. Пад парк ужо адведзены і спланаваны зямельны ўчастак за 5 км ад Гальшан у былой шляхецкай сядзібе Родзевічы, створаныя і друкуюцца на 3D-друкарцы паменшаныя копіі замкаў і храмаў.
Нядаўна для паскарэння друку аб'ектаў дырэктар Алесь Варыкіш абвясціў пра пачатак кампаніі па зборы сродкаў на набыццё двух дадатковых 3D-друкарак. Зрабіць свой унёсак у стварэнне парку можна на сайце Талакі.
Па падрабязную інфармацыю звяртайцеся:
(29) 6546484 Алесь Варыкіш
(29) 8656324 Ігар Станкевіч - PR-менеджэр праекта
Каментары