Шуневіч: «Наступае жастачайшая лібералізацыя». Цяпер на Бангалорах можна будзе мітынгаваць без дазволу
25 кастрычніка міністр унутраных спраў Ігар Шуневіч у палаце прадстаўнікоў прэзентаваў змены ў закон аб масавых мерапрыемствах.
Распавядаючы журналістам пра папраўкі ў закон, кіраўнік МУС зазначыў: «Калі чалавек захоча правесці масавую акцыю, то ў дазволеным месцы ён зможа правесці гэта без дазволу ўладаў. Калі ў недазволеным месцы — трэба будзе дазвол мясцовых уладаў».
Гэта азначае, што для правядзення мерапрыемстваў у месцах кшталту парка Дружбы Народаў у Мінску дазволу больш не будзе трэба. Варта адзначыць, што гэта непрэстыжныя месцы наводшыбе.
«Надыходзіць жастачайшая лібералізацыя», — пажартаваў Шуневіч.
Выступаючы перад дэпутатамі, міністр Шуневіч дадаў, што арганізатарамі масавых акцый не змогуць быць людзі з непагашанымі судзімасцямі. Таксама пастрожыцца адказнасць грамадскіх арганізацый і палітычных партый за парушэнне правілаў правядзення масавых акцый. Будзе забаронена рэкламаваць акцыю да таго, як яе дазволілі — гэты пункт закране ў тым ліку СМІ і блогераў. Дазволеныя месцы правядзенння масавых мерапрыемстваў вызначаць мясцовыя ўлады.
Міністр Шуневіч таксама выказаўся пра некаторыя гучныя справы апошняга часу.
У прыватнасці, каментуючы ДТЗ на вуліцы Кальварыйскай у Мінску 7 кастрычніка, калі п'яны дырэктар фітнэс-цэнтра «Нардзін», грамадзянін Расіі Вячаслаў Карнеявец за рулём BMW пратараніў таксі. Кіроўца таксі апынуўся з цяжкімі траўмамі ў бальніцы, стан яго цяжкі.
«Вядзецца праверка дзеянняў інспектара, які адпусціў п’янага грамадзяніна. Калі праверка пакажа, што ён парушыў інструкцыю, то будзе пакараны», — запэўніў Шуневіч.
Задалі міністру пытанне і пра Улада Казакевіча, асуджанага за напад з бензапілой у ГЦ «Еўропа», які роўна праз год напаў з нажом на кантралёра ў калоніі.
«Ён цяпер знаходзіцца ў СІЗА. Вядзецца праверка. Ён арыштаваны, чакаем суда», — зазначыў міністр.
Закранаючы абставіны затрымання ўкраінца Паўла Грыба, міністр зазначыў, што высвятляюцца ўсе абставіны знаходжання на тэрыторыі Беларусі і ад'езду з яе. «Казаць пра тое, што Грыб быў незаконна вывезены, яшчэ рана. Вывучаюцца ўсе абставіны», — дадаў Шуневіч.
Ігар Шуневіч адмовіўся каментаваць чуткі аб магчымым прызначэнні яго міністрам абароны замест Раўкова. Затое ён выказаўся пра выпадкі дзедаўшчыны ў войску.
«Я тры гады праходзіў службу ў ваенна-марскім флоце і ведаю, што парадак у вайсковых частках забяспечваюць не толькі старшыя, але і малодшыя камандзіры. У пытаннях дзедаўшчыны усё залежыць ад іх. Часам патрабуецца жорсткае падпарадкаванне, але размеркаванне абавязкаў павінна быць справядлівым. Прыніжэнне, псіхалагічны і фізічны ціск на маладога байца — ганьба для ўсіх», — сказаў Шуневіч.
***
На тэлеграм-канал «Нашай Нівы» можна падпісацца тут.
Цяпер чытаюць
Легендарная журналістка Любоў Лунёва расказала пра Віктара Лукашэнку і аднакурснікаў, стварэнне «Вясны» і палітычны бамонд1
Каментары