Святлана Ціханоўская расказала пра хваробу сына і яго цікавасць да геапалітыкі
«Насамрэч досыць доўга я прымала гэты дыягназ».
Святлана Ціханоўская ў новым выпуску ток-шоу «Жыццё-маліна» расказала пра хваробу сына.
Ён нарадзіўся глухім, што для бацькоў стала нечаканасцю.
«Гэта было маё першае мацярынства. Ён нібы і агукаў, і неяк рэагаваў. І потым, калі ты разумееш, што ўжо год, а нават лепету не з'явілася, мы пайшлі па дактарах. І нам паставілі такі дыягназ», — згадвае Святлана і падкрэслівае, што вельмі ўдзячная мужу за падтрымку:
«Я магла раскіснуць, бо як для маці для мяне гэта быў вялікі ўдар, а ён адразу як бізнэсовец: так, план дзеянняў, што ён павінен зрабіць. (…)
Прыйшлося пераасэнсаваць, і пераплакаць, і перажыць гэты боль, але Сяргей высветліў, што можна ў дадзеным выпадку зрабіць. І мы вельмі доўга чакалі аперацыю, таму што не было кахлеарных імплантаў у Беларусі.
І зрабілі гэтую аперацыю. Вядома, увесь цяжар рэабілітацыі лёг на мяне. Але гэтае задавальненне было не таннае, і Сяргей закрываў усе рэабілітацыйныя моманты».
«Насамрэч досыць доўга я прымала гэты дыягназ», — прызнаецца Святлана. Цяпер жа ўспрымае гэта як норму:
«Я вельмі радая, што мы выцягнулі гэтую праблему. Я, вядома, магу сказаць, што паклала шмат-шмат гадоў на гэта, але яно таго каштавала. Цяпер мне часам здаецца: «Ну, Карней, можа, ты ўжо памаўчыш». А сама думаю: Божа мой, якое шчасце».
Святлана адзначае, што імёны іх дзяцей — Карней і Агнія — не звязаны з вядомымі савецкімі дзяцячымі пісьменнікамі Карнеем Чукоўскім і Агніяй Барто.
«Гэта ў Сяргея мамы некалі дзядулю ці прадзядулю звалі Карней. Яна прапанавала, мы пагадзіліся. Прыгожае, незвычайнае імя. А [імя] дочкі выбіралі таксама доўга. Мая ідэя была. Перабірала імёны. Вось, спадабалася Агнія. Ну, проста так супала».
Цяпер сыну 15 гадоў, і ён, па словах Святланы, цікавіцца геапалітыкай:
«Яму вельмі цікавая геапалітыка. (…) Ён, вядома, усё гэта чэрпае з інтэрнэту. (…) Ён глядзіць Дудзя, Шрайбмана. (…) Яму гэта цікава. Ніхто ж не прымушаў, і ён расказвае, які канфлікт Палестына-Ізраіль. Украіна яму таксама вельмі блізкая, Беларусь. І пра Трампа свае думкі выказвае. Гэта вельмі з такога нявопытнага пункту гледжання, ён мне кажа тэзісамі, якія ён пачуў у гэтых відэа».
Ціханоўская дадае, што сын любіць гісторыю і геаграфію:
«Ён можа гадзінамі — бярэ гугл-карту і падарожнічае па гугл-карце. Вось ён «пабываў» у Парыжы, убачыў Эйфелеву вежу, у Японію «з'ездзіў». Ён ужо ведае, дзе якія славутасці. Яму цікава. Ён такі трошкі інтраверт. Яму камфортна слухаць, убіраць [інфармацыю]».
«У пашпарце бабулі стаіць дата нараджэння 00.00.1945» — «А ў маёй XX.XX.1940». Як такое можа быць?2
Каментары