Naviny sportu

Našy ŭ Raterdamie

Biełaruskija dziudaisty (hałoŭny trener — Mahamied Ramazanaŭ) viarnulisia z čempijanatu Eŭropy, jaki prajšoŭ u minułyja vychodnyja ŭ Raterdamie (Niderlandy), z dvuma bronzavymi medalami. Treciaje miesca ŭ vahavoj katehoryi da 48 kh zavajavała Taciana Maskvina, druhaja ŭznaharoda na rachunku Alaksandra Šłyka (66 kh). Alimpijski čempijon Ihar Makaraŭ pieršynstvo kantynentu prapuskaŭ z pryčyny traŭmy.

Pośpiech Krykunova

Pavodle apytańnia hazety «Sport-ekspriess», hałoŭny trener maskoŭskaha «Dynama» i zbornaj Rasiei Ŭładzimier Krykunoŭ pryznany najlepšym chakiejnym treneram Rasiei sezonu 2004/05. Za jaho padali hałasy 19 z 20 chakiejnych specyjalistaŭ.

Krykunoŭ pryvioŭ rasiejcaŭ da «bronzy» na sioletnim čempijanacie śvietu pa chakiei i maskvičoŭ da załatych medaloŭ rozyhryšu superlihi. Zaznačym, što za časami SSSR jon treniravaŭ mienskaje «Dynama», u pačatku 1990-ch pracavaŭ u Słavienii, a potym uznačalvaŭ biełaruskiu ladovuju družynu, ź jakoj dabiŭsia najlepšaha pośpiechu ŭ historyi — čaćviortaha miesca na zimovaj Alimpijadzie ŭ Sołt-Łejk-Sicč ŭ 2002 hodzie.

Kubak Puntusa

U niadzielu na staličnym stadyjonie «Dynama» prajšoŭ finał Kubku Biełarusi pa futbole. MTZ-RIPA pieramahła barysaŭski BATE — 2:1. Jury Puntus, kali ŭznačalvaŭ BATE, tak i ni razu nia zdoleŭ zdabyć Kubak. I voś u pieršuju viasnu ŭ mienskim klubie trafej zavajavany. MTZ-RIPA taksama zdabyła prava pradstaŭlać Biełaruś u Kubku UEFA. Futbołu ŭ žniŭni ŭ Miensku paboleje.

Zakryćcio chakiejnaha sezonu

Na tym tydni ŭ Miensku prajšło pasiadžeńnie vykanaŭčaha kamitetu Federacyi chakieju. Sioleta ŭ Adkrytym čempijanacie Biełarusi zhulajuć 12 kamandaŭ, u tym liku dźvie łatvijskija i adna ŭkrainskaja. Pačatak rehularnaha pieršynstva — 7 vieraśnia.

Z uvahi na sytuacyju ź Cimafiejem Filinym, jakoha na čempijanacie śvietu zaśpieli na dopinhu, pastanavili taksama ŭvieści pastajanny dopinh-kantrol, jaki ciapier budzie pravodzicca paśla kožnaha matču. Uviedziena i kvota na lehijaneraŭ. U zajaŭku na matč možna ŭklučać 10 «zamiežnikaŭ», ale vystaŭlać na hulniu možna nia bolej za siem.

Himn dapamoh

Hruzinski ciažkaatlet, čempijon śvietu pa kikboksinhu Nuzhar Hahračadze 22 traŭnia ŭstalavaŭ u Tbilisi novaje dasiahnieńnie, što pretenduje na ŭklučeńnie ŭ Knihu rekordaŭ Hinesa. Raniejšaje naležała słavaku Džuru Barbaryku. Na centralnym čyhunačnym vakzale stalicy Hruzii Nuzhar zrušyŭ — šlacham prymacavanaha da plačej kanatu — na adlehłaść 5 metraŭ 63 santymetry 12 vahonaŭ ahulnaj vahoj 1 tys. 50 tonaŭ.

Zrabić heta Hahračadze zdoleŭ z treciaj sproby, paśla dźviuch niaŭdałych sprobaŭ jon paprasiŭ ŭklučyć nacyjanalny himn Hruzii. I ŭsio atrymałasia.

Aleh Rajaviec, pressball.by, sport-express.ru

• 0
• 0
• 0
• 0
• 0
• 0
• 0
• 0