Dzie varta być

U Laŭkach i Miry.

Laŭkoŭski plener

1—10 lipienia ŭ Laŭkach pad Voršaj projdzie IX Mastacki plener imia Jazepa Drazdoviča. Udzieł u im voźmuć 12 maładych mastakoŭ i 12 maładych litarataraŭ. Dla ich buduć zładžany majstar-klasy: dośviedam padzielacca pa šeść vykładčykaŭ-mastakoŭ i vykładčykaŭ-litarataraŭ. Dapamahać arhanizataram buduć achvotniki. Ahułam u dziejnaści letniku voźmuć udzieł kala paŭsotni čałaviek. Pryjeduć bardy Viktar Šałkievič, Lera Som.

Plener pačynaŭsia ź letnikaŭ u miaścinach, źviazanych ź imiem Drazdoviča. Adnak užo ŭ 2003 h. akcyja adbyłasia ŭ Šarkaŭščynie i pryśviačałasia słynnamu sadavodu Ivanu Sikoru i mastaku Piotru Sierhijeviču. Letaś plener adbyŭsia ŭ Bykaŭskich miaścinach. Sioletni pryśviečany Ŭładzimieru Karatkieviču.

Adkryćcio letniku maje adbycca 1 lipienia ŭ Viciebsku, paśla čaho ŭdzielniki vypraviacca ŭ Laŭki.

Jak dajechać da Laŭkoŭ

Svajoj mašynaj paŭz Barań i Kopyś. Z «alimpijki» zvaročvać lepš na Kochanava. La muzeju jość parkoŭka;

aŭtobusam Vorša—Kopyś (6.30, 10.00, 13.30, 16.40) da prypynku «Muzej Janki Kupały», daroha budzie kaštavać 1670 rub.;

dyzelem Vorša—Mahiloŭ (9.18, 11.36, 14.45, 17.14, 19.43), bilet da Kopysi kaštuje 1200 rubloŭ.

Naŭprost ź Viciebsku da Kopysi možna dajechać ciahnikom №645 Viciebsk—Bieraście, jaki adychodzić u 18.20 i pryjaždžaje ŭ 21.00.

Pierad vyjezdam abaviazkova patelefanavać pa lubym z numaroŭ: 625-62-48 (Viktar), 319-65-74 (Hienadź).

￭

Žyvaja historyja pad Miram

U vychadnyja, pačynajučy ad 2 lipienia i da kastryčnika, ad 9.00 da 17.30 la muroŭ Mirskaha zamku buduć iści prahramy žyvoj historyi. Naviedniki zmohuć dałučycca da tradycyjnych biełaruskich abradaŭ i ramiostvaŭ, prymieryć rycarskija łaty, uziać uroki siaredniaviečnaha fechtavańnia, staradaŭnich tancaŭ. 2—3 lipienia prahramu «Tradycyjnyja ramiostvy Biełarusi» pradstaŭlajuć udzielniki Klubu amataraŭ žyvoj archiealohii z Brasłava. Hvozd prahramy — rytuał zdabyčy žyvoha ahniu.

￭

Karcina-lehienda

vystaŭlenaja ŭpieršyniu za 30 hadoŭ. Admysłova vyrableny padramnik kaštavaŭ muzeju 1500 dalaraŭ. Piša Adam Voršyč.

Karcina Valancina Vołkava «Miensk 3 lipienia 1944 hodu» vystaŭlajecca ŭpieršyniu za amal 30 hadoŭ. 28 červienia karcinu vynieśli z zapaśnikaŭ muzeju j źniali z barabana, na jaki jana była nakručanaja. Ekspanavacca ŭ Mastackim muzei jana budzie z 1 lipienia da 29 žniŭnia.

Na pres-kanferencyi, pryśviečanaj adkryćciu vystaŭki, dyrektar muzeju Ŭładzimier Prakapcoŭ adznačyŭ, što «bolš lahična było b pravieści takuju vystaŭku letaś, ale hod byŭ nasyčany»: pamiaškańnie rychtavali pad pakaz tvoraŭ z Traćciakoŭskaj halerei. Dyj padrychtoŭka znakavaj karciny biełaruskaha savieckaha mastactva da ekspazycyi vymahała značnych vysiłkaŭ: byŭ navat admysłova vyrableny padramnik, jaki kaštavaŭ muzeju 1500 dalaraŭ.

Pavodle pahadnieńnia pamiž uradam BSSR i mastakom, padpisanaha ŭ sakaviku 1945 h., karcina pavinna była ŭpryhožyć zalu pasiadžeńniaŭ Domu ŭradu. Hetaj umovaj byli zadadzieny i parametry pałatna.

Vołkaŭ pracavaŭ marudna, až navat Sajuz mastakoŭ u 1950 h. musiŭ stvaryć kamisiju dla vyznačeńnia, ci nie znarok jon zamarudžvaje. Pieršy raz «na ludziach» karcina była vystaŭlenaja ŭ Maskvie ŭ 1953 h. Potym byli jašče dapracoŭki, i ŭ 1955 h. karcina znoŭ źjaviłasia ŭ Maskvie — na vystaŭcy ŭ VDNH. Nacyjanalny mastacki muzej, jak raskazvajuć jaho rabotniki, pierachapiŭ vołkaŭskuju karcinu ŭ Traćciakoŭki — kupiŭ za 150 tys. rub.! U čas, kali siaredni zarobak składaŭ kala 400 rub., za karcinu zapłacili hrošy prosta šalonyja! Praŭda, sam mastak ličyŭ, što jamu nie dapłacili: maŭlaŭ, 10 hadoŭ pracy i vydatkavanyja materyjały kaštujuć bolej.

Na dumku muzejščykaŭ, hetyja niepamiernyja hrošy, a taksama aktyŭnaja tvorčaja praca Vołkava za niemcami, jakija vydatkavali jamu persanalnuju majsterniu, stali pryčynaj tryvałaje nielubovi da Vołkava ŭ mastakoŭskim asiarodku. Da taho ž, chadziła pahałoska, što karcina ŭ svajoj pieršaj versii była stvoranaja ŭ 1941-m i na joj byŭ vyjaŭleny ŭjezd u Miensk… niemcaŭ!

Jašče adna historyja źviazvaje karcinu Vołkava j Maskvu. Naščadki mastaka kažuć, što pavialičanaja versija karciny pisałasia dla pieravozu ŭ stalicu SSSR, była daviedziena da stadyi padmaloŭki — i źnikła.

Kab karcinu ŭbačyła bolšaja kolkaść hledačoŭ, muzej navat budzie pracavać 3 lipienia — u śviatočny dzień. Aprača vołkaŭskaj karciny, pobač možna budzie ŭbačyć aŭtarskija eskizy j malunki da jaje, a taksama fatahrafii, zroblenyja ŭ Miensku 3 lipienia 1944 h.

• 0
• 0
• 0
• 0
• 0
• 0
• 0
• 0