Jak pry klatym caryźmie

50 radkoŭ redaktara

Havaryli pra viartańnie stalinskich časoŭ, a viarnulisia carskija. Pałata-Duma izabražaje demakratyju. Narod vieruje ŭ cara-baćku. Apazycyjnyja palityki siadziać u Šušanskich abo Łonžiumo. «Naša Niva» vychodzić. Bahdanovičy-Chadanovičy pišuć. Carskaj miłaściu Traščanok zmahajecca z šlachieckim upłyvam. I samadziaržaŭje, i pravasłaŭje, i narodnaść — usio ŭ najaŭnaści. I adpaviednaja dyskusija zapadnarusaŭ ź biełarusami.

Chvala abureńnia

Najlepšy adkaz «Niamieckaj chvali» dało, viadoma, MTV. Na žal, hurtok radyjoamataraŭ parušyŭ padstavovy pryncyp nacyjanalnaha adzinstva: adradžeńnie movy i nacyjanalnaj kultury staić pa-za abmierkavańniem. Vybuchnuła dyskusija. Rašeńnie «Niamieckaj chvali» razburyła adzinstva niezaležnaha hramadztva. Dla mianie hetaha dosyć, kab jano było pierahledžanaje. A voś jak stavić pytańnie Siarhiej Chareŭski: hramadztva vierniecca da narmalnaści, kali staniecca pakajańnie za adračeńnie ad movy. Kali ž usio śpisvajecca na «abjektyŭnaść» pracesaŭ, zastajecca pravapierajemnaść starych rusifikatarskich tradycyj. Bliskučy adkaz zarasiejščykam daje Vital Silicki. Dla mianie ž važna było pačuć mierkavańnie Vasila Siomuchi — kultavaha pierakładčyka ź niamieckaj.

U ciapierašniaj sytuacyi vinavataja nia stolki Niamieččyna. Tamu važna ŭnikać krajnaściaŭ, antyniamieckaja rytoryka niedarečnaja. Važna adnaŭlać i budavać niamiecka-biełaruski davier. Niamieččyna, biez sumnievu, budzie stratehičnym partneram Biełarusi paśla viartańnia krainy ŭ mejnstrym eŭrapiejskaj historyi.

Hałoŭny arhument, jakim karystajucca prychilniki rasiejskaj movy «Niamieckaj chvali», — vyniki sacyjalahičnych apytańniaŭ NISEPD. Daŭniejšych revalucyjaneraŭ nazyvali niavolnikami idejaŭ, ciapierašnija — toža mnie dysydenty — raby sacyjalohii.

A biełarusy — my ž narod asablivy. My jašče nia vyznačylisia, nie sfarmavalisia da kanca. U nas pytajuć: ty za što? A my kažam: ja i za toje, i za toje. My za sajuz z Rasiejaj i ŭvachodžańnie ŭ Eŭropu šaściu huberniami. Za biełaruskuju movu i rasiejskuju taksama. Ech, nia možna, škada, hałasavać za niekalkich kandydataŭ adrazu. I jak ty da nas padydzieš z sacyjalahičnym miaryłam?

Drama Tozika

Aryšt dyrektara «Džem-banku» ahaliŭ kanflikt, jaki tleje ŭ Łukašenkavym atačeńni. Źjavilisia publikacyi ab tym, što dyrektar «Džem-banku» Alaksandar Tataryncaŭ «źviazany» z kiraŭnikom Administracyi prezydenta Viktaram Šejmanam. Miž tym spravu «Džemu» ŭzbudziŭ Kamitet finansavych śledztvaŭ Dziaržkantrolu.

• 0
• 0
• 0
• 0
• 0
• 0
• 0
• 0