Pačaŭsia vizit u Minsk dakładčyka delehacyi Jeŭraparłamienta pa Biełarusi Paleckisa

Z 18 pa 21 sakavika prachodzić vizit u Minsk dakładčyka delehacyi Jeŭraparłamienta pa Biełarusi, namieśnika kiraŭnika delehacyi JEP pa suviaziach ź Biełaruśsiu 71-hadovaha Justasa Paleckisa (Litva). Meta vizitu — padrychtoŭka dakłada ab stanie spraŭ u adnosinach pamiž ES i Biełaruśsiu.

U pieršy dzień vizitu Paleckis sustreŭsia z kiraŭnikom pradstaŭnictva Jeŭrasajuza Majraj Moraj, namieśnikam ministra zamiežnych spraŭ Biełarusi Alenaj Kupčynoj, kiraŭnikom Biełaruskaj partyi levych «Spraviadlivy śviet» Siarhiejem Kalakinym i sustaršynioj arhkamiteta pa stvareńni partyi «Biełaruskaja chryścijanskaja demakratyja» Vitalem Rymašeŭskim.

Na 19 sakavika zapłanavany sustrečy jeŭradeputata z pasłami krain ES,

20 sakavika Paleckis sustreniecca z kiraŭnikom Biełaruskaha Chielsinkskaha kamiteta Aleham Hułakom i pradstaŭnikom zakrytaha ŭładami pravaabarončaha centra «Viasna» Valancinam Stefanovičam, kiraŭnikom analityčnych prajektaŭ infarmacyjnaj kampanii BiełaPAN Alaksandram Kłaskoŭskim, kiraŭnikom analityčnaha centra «Stratehija» Leanidam Zaikam, namieśnikam ministra ekanomiki Dźmitryjem Hołuchavym, sa staršynioj kaardynacyjnaha kamiteta Nacyjanalnaj płatformy Forumu hramadzianskaj supolnaści Uschodniaha partniorstva Uładzimiram Mackievičam.

U prahramie na 21 sakavika — mierapryjemstvy z udziełam staršyni Partyi BNF Alaksieja Janukieviča, lidara ruchu «Za Svabodu» Alaksandra Milinkieviča i pradstaŭnika Biełaruskaha instytuta stratehičnych daśledavańniaŭ Dzianisa Mieljancova.

Rymašeŭski paviedamiŭ, što padčas jaho hutarki z Paleckisam razmova išła pra farmat adnosinaŭ Jeŭrasajuza i Biełarusi, «nakolki mahčyma raźvivać dyjałoh pry vypracoŭcy novaj stratehii ES».

Sustaršynia arhkamiteta BCHD zajaviŭ parłamientaryju, što razmaŭlać z Alaksandram Łukašenka možna tolki z pazicyi siły i ES ni ŭ jakim vypadku nie pavinien zdavać abvieščanyja raniej pazicyi: vyzvaleńnie i reabilitacyja palitźniavolenych, praviadzieńnie svabodnych vybaraŭ i inš. «Pieramovy z režymam patrebny, i jany buduć, ale jany pavinny być adkrytymi, kab nie paŭtaryłasia situacyja 19 śniežnia 2010 hoda, paśla jakoj Łukašenka vykazaŭ kryŭdu, što ES jaho ašukaŭ», — skazaŭ palityk. Na jaho dumku, kiraŭnika biełaruskaha MZS Uładzimira Makieja nie treba vyklučać sa śpisa nieŭjaznych u ES: «Ničoha nie źmienicca, kali ahučvać pazicyju ŭładaŭ budzie chtości inšy, bo źniešniuju palityku vyznačaje Łukašenka. Akramia taho, šmat jeŭrapiejskich palitykaŭ uklučany ŭ biełaruski čorny śpis nieŭjaznych».

Rymašeŭski taksama zajaviŭ Paleckisu, što hałoŭnaj pahrozaj suvierenitetu krainy źjaŭlajecca nie mahčymaja skupka Rasijaj ajčynnych pradpryjemstvaŭ, a niekankurentazdolnaść usioj biełaruskaj sistemy — u ekanomicy, palitycy, vajennaj i inšych śfierach.

• 0
• 0
• 0
• 0
• 0
• 0
• 0
• 0