Pa stanie na 26 sakavika niama abjektyŭnych mieteaźviestak, jakija b śviedčyli pra katastrafičnaje raźvićcio padziej.
Kali śnieh pačnie chutka tajać, to moža zdarycca nadzvyčajnaja situacyja dziaržaŭnaha maštabu, paviedamiŭ žurnalistam 25 sakavika kiraŭnik słužby prahnozaŭ Respublikanskaha hidramieteacentra Dźmitryj Rabaŭ. Sioleta ŭ Biełarusi vypała vialikaja kolkaść śniehu, toje samaje adbyłasia i va Ukrainie. Apošni fakt budzie ŭpłyvać na Prypiać i našy paŭdniovyja reki.
U hutarcy z karespandentam «NN» načalnik pres-słužby MNS Vital Navicki paraiŭ pakul nie dramatyzavać situacyju. Tearetyčna rezkaje paciapleńnie moža vyklikać mocnuju pavodku, adnak pa stanie na 26 sakavika niama abjektyŭnych mietearałahičnych źviestak, jakija b śviedčyli pra takoje raźvićcio padziej.
Pavodle papiarednich prahnozaŭ, sioleta jość vierahodnaść padtapleńnia prykładna 120 nasielenych punktaŭ, 60 učastkaŭ daroh, pryblizna 20 sadovych tavarystvaŭ i 19 mastoŭ na terytoryi 40 rajonaŭ Biełarusi. Dla paraŭnańnia: letaś taki prahnoz abiacaŭ pavodku dla 13 rajonaŭ krainy.
Samy niesuciešny prahnoz padrychtavany dla Homielskaj vobłaści. Kali ŭ pačatku sakavika śpiecyjalisty prahnazavali siaredni ŭzrovień pavodki, to bližej da kanca miesiaca prahnoz pahoršyŭsia. U MNS razhladajuć niekalki varyjantaŭ raźvićcia situacyi, u tym liku scenar maštabnaj pavodki na Prypiaci ŭ 1999 hoda.
Akramia Homielščyny ŭ niebiaśpiečnaj zonie znachodziacca rajony Bresckaj, Viciebskaj, Mahiloŭskaj abłaściej.
Adnymi ź pieršych ad pavodki sioleta paciarpieli vioski Stolinskaha rajona Bresckaj vobłaści.
Padrabiazny prahnoz raźvićcia situacyi z pavodkaj u Biełarusi viasnoj 2013 hladzicie na sajcie. MNS.
Uroki vialikaj vady
Najbolš niebiaśpiečnyja pavodki ŭ najnoŭšaj historyi krainy zdaralisia ŭ 1979 i 1999 hh. Maksimalny ŭzrovień vady ŭ rekach siahaŭ 6 mietraŭ.
U ramkach prahramy pa abaronie nasielenych punktaŭ ad pavodki na biełaruskim Paleśsi (2005-2010) pabudavana kala 300 km dambaŭ, 335 km kanałaŭ, 36 pompavych stancyj.
Ciapier čytajuć
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury2
Kamientary