Z 25 maja novych vypadkaŭ zachvorvańnia nie rehistravałasia, a apošni pasažyr zaviaršyŭ karancin.
Suśvietnaja arhanizacyja achovy zdaroŭja abviaściła, što ŭspyška chantavirusa na kruiznym łajniery zaviaršyłasia. Pavodle słoŭ hienieralnaha dyrektara SAAZ Tedrasa Adchanama Hiebrejesusa, apošni pasažyr sudna MV Hondius zaviaršyŭ pieryjad karancinu, atrymaŭ admoŭny vynik testu na chantavirus i viarnuŭsia dadomu, piša Bi-bi-si.
Z 25 maja novych vypadkaŭ zachvorvańnia nie rehistravałasia. «SAAZ ličyć uspyšku chantavirusa zavieršanaj», — dadaŭ kiraŭnik arhanizacyi.
Uspyška, u vyniku jakoj 13 čałaviek zarazilisia i troje pamierli, była vyklikana virusam «And» — redkim štamam chantavirusa.
Nahadajem, što kruiznaje sudna MV Hondius vyjšła ŭ mora z Arhienciny 1 krasavika. 11 krasavika, kali sudna znachodziłasia ŭ akijanie pamiž Arhiencinaj i Paŭdniova-Afrykanskaj Respublikaj, pamior pieršy chvory. 26 krasavika ŭ Jochanesburhu (PAR) pamierła jašče adna pasažyrka. 2 maja, znoŭ na borcie sudna, pamior treci pasažyr.
10 maja sudna było pastaŭlena na prykoł kala porta Teneryfe. Pasažyry, jakich raniej nie evakujavali pa miedycynskich pakazańniach, syšli na bierah i nieŭzabavie byli adpraŭleny samalotami ŭ krainy svajho hramadzianstva.
Raniej SAAZ paviedamiła, što pieršyja dva nośbity virusa pierad pasadkaj na sudna padarožničali pa Arhiencinie, Čyli i Uruhvai. Ich pajezdka, jak adznačała SAAZ, adbyvałasia «ŭ miežach tura pa nazirańni za ptuškami, jaki ŭklučaŭ naviedvańnie miescaŭ pražyvańnia vidaŭ pacukoŭ, što źjaŭlajucca viadomymi pieranosčykami virusa».
Śpiecyjalisty ŭ halinie achovy zdaroŭja miarkujuć, što ŭ hetym vypadku virus, mahčyma, pieradavaŭsia pamiž ludźmi, jakija znachodzilisia ŭ ciesnym kantakcie.
U čaćvier SAAZ paviedamiła, što 33 krainy i terytoryi ŭziali pad nazirańnie bolš za 650 čałaviek, jakija kantaktavali pamiž saboj. Arhanizacyja zajaviła, što budzie praciahvać supracoŭnictva z uradami i partniorskimi arhanizacyjami, kab lepš zrazumieć, jak raźvivałasia jak hetaja ŭspyška, tak i chantavirus u cełym.
Doktar Dyjana Rochas Alvares z SAAZ, vystupajučy na bryfinhu, skazała: «Virus «And» i inšyja chantavirusy pa-raniejšamu ŭjaŭlajuć pahrozu dla hramadskaha zdaroŭja ŭ Paŭdniovaj Amierycy i niekatorych inšych rehijonach, dzie jany źjaŭlajucca endemičnymi». Endemičnyja virusy pastajanna prysutničajuć u navakolnym asiarodździ.
«Nam nieabchodna i dalej adsočvać hety virus i rychtavacca da jaho mahčymaha dalejšaha raspaŭsiudžvańnia», — adznačyła pradstaŭnica SAAZ.
Kamientary