Statkievič admoviŭsia prymać ježu, kali dla jaho stali paznačać posud
Na minułym tydni Maryna Adamovič, žonka Mikałaja Statkieviča, raspaviała, što suprać jaje muža ŭ mahiloŭskaj turmie adbyvalisia pravakacyi. Žonka palitviaźnia, adnak, nia viedała padrabiaznaściaŭ. Ciapier źjavilisia źviestki, jakija krychu pralivajuć śviatło na zdareńni ŭ kamery Mikałaja Statkieviča. Maryna Adamovič paviedamiła karespandentu Svabody:
«Jon sam paprasiŭ ahučyć sutnaść tych pravakacyj, jakija byli ŭčynienyja. Jamu nieadnarazova sprabavali padać ježu ŭ asobnych, admysłova paznačanych talerkach. Uparta jamu padsoŭvali hetyja talerki. Jon ź ironijaj pytaŭsia ŭ turemščykaŭ: „Što, chacieli mianie atrucić?“ Zrazumieła, što tut versij moža być šmat, ale jon nastojvaŭ, kab pra heta stała viadoma».
Pavodle Maryny Adamovič, Mikałaj Statkievič admaŭlaŭsia ad ježy, kali jaje prapanoŭvali ŭ paznačanym asabista dla jaho posudzie.
Mikałaju Statkieviču z hazet viadoma pra akcyju salidarnaści ź im, jakuju naładziŭ u Miensku Pavał Vinahradaŭ. Aktyvist Pavał Vinahradaŭ pakarany za heta 12 sutkami aryštu i adbyvaje pakarańnie ŭ turmie na Akreścina. Mikałaj Statkievič prasiŭ pieradać Paŭłu Vinahradavu słovy ŭdziačnaści za padtrymku.
Taksama viadoma Mikałaju Statkieviču i pra zaŭčasnuju śmierć aktyvista Michała Šaramieta.
«I pra Michała Šaramieta jon taksama daviedaŭsia z hazet i vielmi smutkuje, tamu što dobra viedaŭ Michała. Toj byŭ siabram našaj partyi i byŭ adnym z tych troch ludziej, jakija ratavali Mikołu, vyvodzili jaho z ačapleńnia z Płoščy 19 śniežnia. I, pa sutnaści, byŭ adnym z apošnich, kaho Mikoła bačyŭ na voli».
Były kandydat na prezydenta Mikałaj Statkievič asudžany na 6 hadoŭ źniavoleńnia za padziei 19 śniežnia 2010 hodu. Palityk adbyvaje pakarańnie ŭ mahiloŭskaj turmie.
Kamientary