Ukraina ŭviała zabaronu na ŭvoz ź Biełarusi śviniej, pradukcyi i syraviny ź ich u suviazi z vyjaŭleńniem afrykanskaj čumy śviniej (AČS) na terytoryi respubliki. Adpaviednaje rašeńnie pryniaŭ 22 červienia hałoŭny dziaržaŭny inśpiektar vieterynarnaj miedycyny Ukrainy.
Zabaronieny taksama ŭvoz kormu dla śviniej i ich hienietyčnaha materyjału.
Jak paviedamlaje sajt ukrainskaj Dziaržaŭnaj vieterynarnaj i fitasanitarnaj słužby, takoje rašeńnie pryniata z metaj nie dapuścić zaniasieńnia ŭzbudžalnika afrykanskaj čumy na terytoryju Ukrainy. «Pavodle aficyjnaha paviedamleńnia departamienta vieterynarnaha i charčovaha kantrolu Ministerstva sielskaj haspadarki i charčavańnia Respubliki Biełaruś na terytoryi Hrodzienskaj vobłaści (v. Čapuń, Iŭjeŭski rajon) zarehistravana zachvorvańnie śviniej afrykanskaj čumoj», — kanstatuje sajt ukrainskaha viedamstva.
Pieršaj pra ŭspyšku afrykanskaj čumy śviniej u Biełarusi paviedamiła 21 červienia Rasijskaja fiederalnaja słužba pa vieterynarnym i fitasanitarnym nahladzie (Raśsielhasnahlad). «Pavodle vusnaj infarmacyi kiraŭnictva dziaržaŭnaj vieterynarnaj słužby Respubliki Biełaruś, u Hrodzienskim rajonie zarehistravana afrykanskaja čuma śviniej», — havaryłasia ŭ paviedamleńni Raśsielhasnahladu. U suviazi z hetym Raśsielhasnahlad 21 červienia ŭvioŭ časovyja abmiežavańni na ŭvoz u RF śviniej, śpiermy knyroŭ, śvininy i śvinahadoŭčaj pradukcyi z Hrodzienskaj vobłaści da asobnaha ŭkazańnia.
A nieŭzabavie infarmacyju aficyjna paćvierdziŭ departamient vieterynarnaha i charčovaha nahladu Minsielhascharču Biełarusi. U paviedamleńni departamienta było skazana, što 21 červienia Biełaruskim dziaržaŭnym vieterynarnym centram «u patałahičnym materyjale, atrymanym ad trupa śvińni, jaki naležyć žycharu vioski Čapuń Iŭjeŭskaha rajona Hrodzienskaj vobłaści, vyjaŭleny hienietyčny materyjał uzbudžalnika AČS». «Dziaržaŭnaj vieterynarnaj słužbaj Respubliki Biełaruś pravodzicca kompleks mierapryjemstvaŭ pa likvidacyi ačahu i niedapuščeńni raspaŭsiudžvańnia zachvorvańnia», — zajaviŭ departamient.
Afrykanskaja čuma śviniej — kantahijoznaje zachvorvańnie, jakoje prachodzić u vostraj formie, charaktaryzujecca chutkim ciačeńniem i vialikaj śmiarotnaściu žyvioł (98–100%). Srodkaŭ lačeńnia i śpiecyfičnaj prafiłaktyki hetaj chvaroby niama. Dla čałavieka AČS niebiaśpieki nie ŭjaŭlaje. Ekanamičny ŭron, jaki nanosicca afrykanskaj čumoj śviniej, zaklučajecca z pramych strat pa radykalnaj likvidacyi chvaroby i abmiežavańniaŭ, što prymianiajucca ŭ mižnarodnym handli.
Ciapier čytajuć
Biełaruska ŭładkavałasia ŭ kandytarskuju kramu. Ale vyśvietliłasia, što za naviedvańnie tualeta joj treba płacić1
Kamientary