Na Dzień nastaŭnika – historyi piedahohaŭ, jakim nie soramna hladzieć dzieciam u vočy.
Hościa «Razmovy Kalinkinaj» – nastaŭnica historyi Natalla Iljinič, jakuju dva z pałovaju hoda tamu pastavili pierad vybaram: vyjści z apazicyjnaj partyi abo zvolnicca. Kali nie zhadziłasia, pasiarod navučalnaha hoda nie praciahnuli kantraktu.
Natalla Iljinič 26 hadoŭ adpracavała ŭ talkaŭskaj škole, dzie stvaryła krajaznaŭčy hurtok i sajt«Talka.info», vydała knihu «Talka i navakolli»,
daśleduje nacyjanalna-vyzvalenčaje paŭstańnie 1863 hoda suprać Rasiejskaj impieryi pad kiraŭnictvam Kastusia Kalinoŭskaha ŭ Ihumienskim paviecie, štohod pravodzić Talkaŭski fest – śviata, jakoje lubiać školniki i dobra viedaje hramadskaść. Siarod jejnych vychavancaŭ – fiłosafy, sacyjołahi, historyki dy falkłarysty.
Sp. Iljinič uzhadvaje, što ŭ časy pierabudovy ŭ nastaŭnickaj było hučna ad dyskusijaŭ, ludzi nie bajalisia vykazvać svaju dumku. A ŭ 2000-ja zrabiłasia cicha. «Pryjšli, žurnał uziali dy pajšli na ŭrok».
Hościa prahramy ŭzhadvaje, što niadaŭna paznajomiłasia z nastaŭnikam, jakoha taksama zvolnili za «palityku».
Uładzimir Juržyc vykładaŭ infarmatyku ŭ siaredniaj škole № 20 horada Oršy, a ŭ pieršaj pałovie 2000-ch byŭ jaje dyrektaram. Ni na parłamienckich vybarach 2000 hoda, ni na prezidenckich u 2001-m, uzhadvaŭ jon u presie, ułady jašče nie rychtavali hatovych ličbaŭ u vynikovych pratakołach. Tady nastaŭnikaŭ razam z dyrektarami pradpryjemstvaŭ źbiraŭ staršynia harvykankamu i papiaredžvaŭ, što «prafiesijnyja jakaści» piedahohaŭ buduć aceńvać pavodle vynikaŭ hałasavańnia na ŭčastkach.
Na ŭčastku Uładzimira Juržyca padlik hałasoŭ adlustroŭvaŭ sapraŭdnuju volu vybarcaŭ, i ŭžo ŭ 2004-m uznačalić kamisiju jamu nie dazvolili. Ale jon zastavaŭsia dyrektaram škoły, dzie byŭ učastak, i zdoleŭ damahčysia praŭdzivaha padliku. Tady za treci prezidencki termin Alaksandra Łukašenki prahałasavali 48 %. Z časam sp. Juržyca pazbavili nie tolki pasady dyrektara, ale i nastaŭnika.
Choć jašče ŭ 2007-m dziaržaŭnaja hazieta «Respublika» pisała pra jaho: «… talenavity čałaviek – talenavity ŭva ŭsim».
Hetki vypadak zdaryŭsia ŭ Miensku i z adnakurśnicaju Natalli Iljinič. Ciapierašniuju situacyju ŭ škole jana pradkazalna paraŭnoŭvaje z 1930-mi hadami.
Ciapier čytajuć
Kolkaść sudoŭ pa palityčnych kryminałkach źmienšyłasia ŭ razy6
Kamientary