На Дзень настаўніка – гісторыі педагогаў, якім не сорамна глядзець дзецям у вочы.
Госця «Размовы Калінкінай» – настаўніца гісторыі Наталля Ільініч, якую два з паловаю года таму паставілі перад выбарам: выйсці з апазіцыйнай партыі або звольніцца. Калі не згадзілася, пасярод навучальнага года не працягнулі кантракту.
Наталля Ільініч 26 гадоў адпрацавала ў талькаўскай школе, дзе стварыла краязнаўчы гурток і сайт«Talka.info», выдала кнігу «Талька і наваколлі»,
даследуе нацыянальна-вызваленчае паўстанне 1863 года супраць Расейскай імперыі пад кіраўніцтвам Кастуся Каліноўскага ў Ігуменскім павеце, штогод праводзіць Талькаўскі фэст – свята, якое любяць школьнікі і добра ведае грамадскасць. Сярод ейных выхаванцаў – філосафы, сацыёлагі, гісторыкі ды фалькларысты.
Сп. Ільініч узгадвае, што ў часы перабудовы ў настаўніцкай было гучна ад дыскусіяў, людзі не баяліся выказваць сваю думку. А ў 2000-я зрабілася ціха. «Прыйшлі, журнал узялі ды пайшлі на ўрок».
Госця праграмы ўзгадвае, што нядаўна пазнаёмілася з настаўнікам, якога таксама звольнілі за «палітыку».
Уладзімір Юржыц выкладаў інфарматыку ў сярэдняй школе № 20 горада Оршы, а ў першай палове 2000-х быў яе дырэктарам. Ні на парламенцкіх выбарах 2000 года, ні на прэзідэнцкіх у 2001-м, узгадваў ён у прэсе, улады яшчэ не рыхтавалі гатовых лічбаў у выніковых пратаколах. Тады настаўнікаў разам з дырэктарамі прадпрыемстваў збіраў старшыня гарвыканкаму і папярэджваў, што «прафесійныя якасці» педагогаў будуць ацэньваць паводле вынікаў галасавання на ўчастках.
На ўчастку Уладзіміра Юржыца падлік галасоў адлюстроўваў сапраўдную волю выбарцаў, і ўжо ў 2004-м узначаліць камісію яму не дазволілі. Але ён заставаўся дырэктарам школы, дзе быў участак, і здолеў дамагчыся праўдзівага падліку. Тады за трэці прэзідэнцкі тэрмін Аляксандра Лукашэнкі прагаласавалі 48 %. З часам сп. Юржыца пазбавілі не толькі пасады дырэктара, але і настаўніка.
Хоць яшчэ ў 2007-м дзяржаўная газета «Рэспубліка» пісала пра яго: «… таленавіты чалавек – таленавіты ўва ўсім».
Гэткі выпадак здарыўся ў Менску і з аднакурсніцаю Наталлі Ільініч. Цяперашнюю сітуацыю ў школе яна прадказальна параўноўвае з 1930-мі гадамі.
Цяпер чытаюць
Скандал у Барысаўскай бальніцы: на пацыента звярнулі ўвагу праз шэсць гадзін, калі ўжо пена пайшла з рота — мужчына памёр6
Скандал у Барысаўскай бальніцы: на пацыента звярнулі ўвагу праз шэсць гадзін, калі ўжо пена пайшла з рота — мужчына памёр
«Цяпер мне чужая сама канцэпцыя ўжыць нешта, чаго ты не ведаеш». Вялікая гутарка з Іванам Шылам пра бізнэс, зараблянне з дапамогай ШІ, жанчын і ботакс1818
Каментары