Jak atrymać letam «šenhien»? Čamu biełarusam u im admaŭlajuć i dzie atrymać vizu praściej?

— Jak ciapier praściej za ŭsio atrymać šenhienskuju vizu?

— Praściej za ŭsio aformić vizu, na moj pohlad, u tym vypadku, kali turysty padajucca pad pakietna arhanizavany tur. I mnie zdajecca, tut možna razhladać lubuju krainu: heta moža być Francyja, Vienhryja, taja ž Hrecyja, Ispanija. Adziny momant — zajmacca takoj vizaj treba vielmi zahadzia.

Ciapier, kab trapić navat u pakietny tur, zajaŭku pažadana padavać za paŭhoda da mierkavanaha adpačynku, kab ciabie prosta paśpieli ŭklučyć u śpis.

Bo miescaŭ stała značna mienš, źjavilisia kvoty, a achvotnych pa-raniejšamu šmat. Kali my havorym z punktu hledžańnia statystyki, to, na moj pohlad, dobraja statystyka ŭchvaleńniaŭ u niemcaŭ, italjancaŭ, francuzaŭ i vienhraŭ.

— Jakija najbolš raspaŭsiudžanyja pamyłki robiać ludzi, kali afarmlajuć vizu samastojna?

— Pieršaje — heta niapravilna padrychtavanyja dakumienty. Naprykład, padajucca nie na toj typ vizy, niapravilna zapoŭnienaja ankieta. Dzie-niebudź nie chapaje podpisu, dzie-niebudź — ptušački, dzie-niebudź čałaviek paznačyŭ adnu infarmacyju, a ŭ inšym dakumiencie jana adroźnivajecca.

Druhoje — heta admiena braniravańniaŭ hatelaŭ adrazu paśla atrymańnia vizy.

Konsulstvy vybaračna praviarajuć turystaŭ, i kali čałaviek traplaje pad takuju pravierku i vyjaŭlajecca, što adbyłasia admiena hatelaŭ, konsulstva moža nieadkładna, bieź jakich-niebudź zvankoŭ i paviedamleńniaŭ, anulavać vizu ŭ sistemie.

A potym ludzi pryjazdžajuć na pamiežny punkt, u ich u pašparcie staić «šenhien», a im kažuć, što ich viza niesapraŭdnaja.

— Čamu turystu z dobraj vizavaj historyjaj mohuć admović, a čałavieku z čystym pašpartam — dać vizu?

— Navat kali ŭ ciabie dobraja vizavaja historyja, naprykład, było 20 viz, usie jany byli vydatna vykarystanyja, usio roŭna niama nijakaj harantyi, što na 21‑y raz tabie pastaviać vizu. Pasolstva naohuł nie abaviazana tłumačyć, čamu jano pryniało rašeńnie ab admovie. Byvaje i naadvarot: čałaviek moža pryjści z absalutna čystym pašpartam, u jaho nikoli nie było šenhienskich viz, i jamu spakojna pastaviać vizu.

Pavialičyć

Kožnaja padača razhladajecca nanova. Hladziać dakumienty, finansy, pracu, metu pajezdki, jak čałaviek vykarystoŭvaŭ papiarednija vizy, kali jany byli. U nas navat byvajuć situacyi, kali padajecca siamja z absalutna adnolkavym pakietam dakumientaŭ, adnym maršrutam, adnymi broniami — u vyniku dziciaci mohuć pastavić multyvizy, mamie — adnarazovuju, a tatu — naohuł admovu. Łohiki ŭ hetym my taksama nie razumiejem.

Tamu papiarednija vizy — heta, viadoma, plus. Dobraja vizavaja historyja pakazvaje, što čałaviek jeździŭ, viartaŭsia, narmalna vykarystoŭvaŭ svaje vizy. Ale ŭsprymać heta jak harantyju dakładna nielha.

— Jakuju sumu pažadana mieć na rachunku dla atrymańnia šenhienskaj vizy?

— Dla kožnaj jeŭrapiejskaj krainy isnuje svoj peŭny finansavy paroh, jakoha čałaviek pavinien prytrymlivacca. Kali jon hety paroh nie vykonvaje, to, naturalna, taki turyst ličycca finansava nienadziejnym, i jamu mohuć admović. Tamu tut treba bolš detalova razhladać toj pakiet dakumientaŭ, jaki patrabuje kankretnaje pasolstva, i vykonvać jaho patrabavańni.

Naprykład, u Ispanii minimalny paroh — €122 u sutki na čałavieka. Kali na vašym rachunku budzie chacia b na €3—4 u sutki mienš, užo ličycca, što finansaŭ u turysta niedastatkova.

Tamu lepš, viadoma, nie brać sumu ŭščylnuju, a raźličvać niedzie €130—150 i vyšej na čałavieka ŭ dzień i ŭžo ad hetaha ličyć nieabchodnuju sumu na ŭsiu kolkaść dzion znachodžańnia.

Kali jedzie siamja ź dziciom, dzicia da 18 hadoŭ pracavać nie moža, tamu tata, mama abo inšy zakonny pradstaŭnik stanovicca jaho sponsaram. Jak praviła, heta toj z baćkoŭ, u kaho bolšy zarobak.

— Ci praŭda, što čym bolš hrošaj na rachunku, tym vyšej šaniec atrymać vizu?

— Ja naohuł prychilnica takoj idei, što čym bolš hrošaj pakazvajuć turysty, tym horš dla ich. Tamu što mnohija konsulstvy rasceńvajuć heta jak nie pramy, ale častkovy napamin: voś, u mianie jość finansy, i vy abaviazanyja mianie ŭpuścić.

Tamu nie varta sprabavać ździvić konsuła vielizarnaj sumaj na rachunku. Treba pakazać realnyja hrošy, jakimi čałaviek sapraŭdy vałodaje i jakija adpaviadajuć jaho dachodam i pajezdcy.

Pavialičyć

— A kali paprasić znajomych pierad padačaj na vizu pieravieści na rachunak niekalki tysiač jeŭra?

— Kali čałaviek atrymlivaje, umoŭna kažučy, 1000—1500 rubloŭ u miesiac, a pierad padačaj u jaho na rachunku raptam źjaŭlajecca €10 tysiač, heta vyklikaje pytańni. Ciapier konsulstvy hladziać nie tolki na kančatkovuju sumu, jakuju čałaviek pakazvaje na rachunku, ale i na ruch hrašovych srodkaŭ: kolki hrošaj zvyčajna pastupaje, kolki čałaviek tracić, jakija sumy prachodziać pa karcie. To-bok važna, kab usio było suvymierna i vyhladała praŭdapadobna.

— Jak ciapier konsulstvy praviarajuć zajaŭnikaŭ?

— Mohuć patelefanavać na pracu — u mianie takija vypadki byli letaś. Kali ŭźnikajuć niejkija dadatkovyja pytańni, to mohuć źviazacca z pracadaŭcam dla ŭdakładnieńnia infarmacyi.

Pryčym telefanujuć navat niepasredna niejkamu kiraŭniku, kab pierapravieryć toje, što cikavić konsulstva.

Jašče praviarajuć, jak turysty vykarystoŭvali vizy raniej: štampy, rachunki (ci byli śpisańni hrošaj z kart za miažoj, u toj krainie, praź jakuju turysty padavalisia i ŭ jakuju chacieli trapić).

Plus praviarajuć najaŭnaść niejkich suviaziaŭ u Biełarusi, to-bok harantyju taho, što turyst vierniecca dadomu.

Kali, naprykład, jość šlub, to abaviazkova prykładajecca paśviedčańnie ab šlubie, ksierakopija.

Pra rachunki i finansy ja ŭžo raskazała, a voś ź niezvyčajnaha mohuć jašče pahladzieć vašy sacyjalnyja sietki abo, naprykład, što vy pisali ŭ telehram-kanałach i hrupach, źviazanych z padačaj na vizu.

Jość, naprykład, roznyja supołki pra vizy, dzie ludzi dzielacca statystykaj abo jašče niejkaj infarmacyjaj. Ale tam, byvaje, uźnikajuć pytańni kštałtu: «Ja biespracoŭny, kali mnie pieraviaduć hrošy, heta spracuje?» Tak što dumajcie, što pytajeciesia.

— Ci praŭda, što adna admova moža sapsavać vizavuju historyju i pryvieści da nastupnych admoŭ u inšych pasolstvach?

— I tak, i nie. Jość šerah konsulstvaŭ, jakija «pierakryvajuć» admovu, a jość tyja, jakija jaje nie pierakryvajuć i staviać paŭtornuju admovu. Ja dakładna viedaju, što tyja ž hreki abo ispancy praktyčna nikoli nie pierakryvajuć admovu, to-bok staviać paŭtornuju. A voś vienhierskaje pasolstva abo italjancy mohuć pierakryć admovu. Zrazumieła, što heta taksama adbyvajecca nie adrazu, treba peŭny čas pačakać, ale šancy tam značna vyšejšyja

Pavialičyć

— Ci isnuje «čorny śpis» turystaŭ i jak u jaho možna trapić?

— Tak, jość takija bazy. Najpierš tudy mohuć trapić turysty, jakija niešta narabili ŭ Jeŭropie i, mahčyma, sami pra heta navat nie viedajuć. Naprykład, pieravysili chutkaść na aŭtamabili i nie zapłacili štraf, niedzie pabilisia i na ich vyklikali palicyju abo niejak jašče parušyli zakon.

Takomu turystu nie adkryjuć vizu da taho času, pakul nie skončycca termin hetaj zabarony.

Ciapier taksama adnavilisia ŭnutranyja pamiežnyja punkty pamiž krainami Jeŭrasajuza. Turystaŭ vybaračna praviarajuć, asabliva aŭtamabili z zamiežnymi numarami i aŭtobusy: hladziać pašparty, vizy i vielmi pilna praviarajuć, jak hetyja vizy vykarystoŭvajucca.

Naprykład, čałaviek jedzie ŭ Ispaniju, ale vizu adkryŭ praz Hrecyju — heta ŭžo moža razhladacca jak nievykanańnie mety vizy. Pamiežniki majuć poŭnaje prava anulavać takuju vizu i pastavić štamp pra toje, što jana niesapraŭdnaja. U horšym vypadku mohuć jašče i zabaranić ujezd u ES — ažno da 5 hadoŭ.

— Kažuć, što niekatoryja vizavyja ahienty majuć suviazi ŭ konsulstvach i mohuć dapamahčy «vyrašyć pytańnie» ź vizaj?

— Nie, heta niapraŭda. U nivodnaha vizavaha ahienctva niama pramych kantaktaŭ z konsulstvam. To-bok my nie možam patelefanavać konsułu i skazać: «Dobry dzień, heta ja, pastaŭcie, kali łaska, majmu turystu vizu».

Kali ahient kaža vam, što ŭ jaho tam pracujuć znajomyja, «svaje ludzi» i hetak dalej, nie viercie.

Rašeńnie ab vydačy vizy prymaje tolki konsuł, i nijaki vizavy ahient, nijakaja turystyčnaja kampanija nie mohuć paŭpłyvać na jaho rašeńnie.

Navat kali ŭjavić, što dzieści tam, za kulisami, konsuła prosiać vydać peŭnamu čałavieku vizu za hrošy, heta nazyvajecca chabaram. Zrazumieła, što nichto nie budzie tak ryzykavać.

My, jak turahienty, možam tolki padrychtavać dakumienty, pravieryć finansavuju častku, maršrut, braniravańni, vizavuju historyju, padkazać, dzie ŭ turysta słabyja miescy. Ale harantavać atrymańnie vizy, jak i termin, na jaki jaje vydaduć, — ni ŭ jakim razie.

— Ci jość niejkija sakretnyja konsulstvy, dzie vizu atrymać praściej, ale pra ich mała chto viedaje?

— Heta čarhovy mif. Kali my havorym pra Daniju, Narviehiju, Šviejcaryju — heta tyja krainy, jakija, na moj pohlad, nikoli nie vydavali dobrych viz. Jany zaŭsiody adroźnivalisia strohim padychodam da pravierki dakumientaŭ. Ci źmianiłasia niešta ciapier? Nie.

Pavialičyć

Kali padavacca, naprykład, u tuju ž Daniju, pra jaje mała chto čuje i viedaje, i pasolstva heta taksama vydatna razumieje. Zajaŭnikaŭ u hetyja krainy vielmi mała i, naturalna, kožnaha takoha zajaŭnika razhladajuć litaralna pad łupaj. Tamu, kali nie chočacie atrymać admovu, lepš vybrać bolš aptymalny varyjant.

— Kolki siońnia realna kaštuje atrymańnie šenhienskaj vizy?

— Tut košt vielmi mocna zaležyć ad taho, jak čałaviek zapisvajecca na padaču. Naprykład, možna samastojna łavić zapis i zapłacić tolki abaviazkovy zbor — €35. Praŭda, čakańnie takoha «akienca» moža zajmać bolš za hod. Tamu źjaŭlajucca płatnyja varyjanty zapisu, dzie košt moža dachodzić da 1500 rubloŭ.

Pry hetym vynik u čałavieka, jaki zapłaciŭ za zapis 1500 rubloŭ, i ŭ čałavieka, jaki dačakaŭsia biaspłatnaha zapisu, adnolkavy.

Tak što sama viza kaštuje adnosna niadoraha, kali čałaviek robić usio samastojna i hatovy čakać.

— Ci možna abskardzić admovu ŭ vizie?

— Tak, možna padrychtavać apielacyju, ale, jak praviła, heta vam nie dapamoža. U asnoŭnym, kali konsuł vyrašyŭ pastavić admovu, chutčej za ŭsio, jon pastavić admovu i paŭtorna.

Ja čuła historyi, kali ludzi padavalisia da tych ža palakaŭ, pryncypova išli, atrymlivali admovy, padavali apielacyi, dakazvajučy svaju racyju, a potym atrymlivali pa čatyry-piać admoŭ u pašparcie i pry hetym ničoha nie dabivalisia.

— Čamu turysty masava pajšli adkryvać pracoŭnyja polskija vizy?

— Pa-pieršaje, heta było bolš-mienš dastupna pa hrošach, pa-druhoje, turysty pryzvyčailisia atrymlivać praciahłyja vizy — chacia b na hod. Palaki stabilna adkryvali vizy na hod, i turysty ščaśliva jeździli, pakul nie pačalisia masavyja pravierki.

Ludzi atrymlivali pracoŭnyja zaprašeńni, adpaviedna, usio heta fihuravała ŭ dziaržaŭnych orhanach Polščy. A potym pačali źviarać: zaprašeńni biełarusy atrymali, a faktyčna ź ich na pracu na terytoryi Polščy amal nichto nie ŭładkavaŭsia. Zamiest hetaha ludzi akazvalisia niedzie ŭ Hrecyi, Ispanii, Italii i hetak dalej.

Tady palaki ŭzmacnili sam padychod da atrymańnia takich viz, i z časam usio heta syšło na ništo.

Varta razumieć, što pracoŭnaja viza — heta vielmi vuzkaja viza, jakaja praduhledžvaje kankretnaje vykarystańnie. Kali turyst atrymaŭ polskuju pracoŭnuju vizu, potym jeździŭ pa joj, umoŭna kažučy, pa parašok u Litvu, a zatym vyrašyŭ padavacca ŭžo na turystyčnuju vizu, dla pasolstva heta pramy sihnał da admovy.

Byli realnyja historyi, kali paśla pracoŭnaj polskaj vizy šerah pasolstvaŭ admaŭlaŭ čałavieku ŭ turystyčnaj vizie. Pravieryć heta pa štampach vielmi lohka: kali čałaviek sapraŭdy jeździŭ pracavać, jon znachodziŭsia tam pa niekalki miesiacaŭ. A kali jon pastajanna jeździŭ tudy-siudy — nu jakaja tut praca?

Što rabić u takoj situacyi? Mianiać pašpart.

— Ci mohuć vizavyja centry naviazvać dadatkovyja pasłuhi, bieź jakich nasamreč možna abyścisia?

— Naprykład, takaja elemientarnaja pasłuha, jak atrymańnie pašparta: niekatoryja vizavyja centry nie chočuć, kab turysty pryjazdžali pa pašparty i zabirali ich samastojna, i naŭmysna ŭklučajuć u pieralik pasłuh abaviazkovuju kurjerskuju dastaŭku pašparta.

Viadoma, kali turyst žyvie, umoŭna kažučy, nie ŭ Minsku, padavaŭsia dzieści ŭ inšym horadzie, to jeździć tudy-siudy jamu nie vielmi zručna. Ale kali turystu praściej zabrać pašpart samastojna, to jaki jamu sens pierapłačvać za heta?

Abo zapaŭnieńnie ankiety. Byvaje takoje, što ŭ vizavym centry mohuć pryčapicca da niejkaha punkta, kab, hruba kažučy, pastavić turysta na ličylnik i jon apłaciŭ dadatkovuju pasłuhu zapaŭnieńnia ankiety ŭžo niepasredna ŭ vizavym centry.

• 1
• 0
• 0
• 1
• 0
• 0
• 1
• 0