Łukašenka paabiacaŭ žorstkaje zmahańnie za nacyjanalnyja intaresy
Pra zajavy na "Dažynkach" piša ŭ svaim błohu Alaksandar Kłaskoŭski.
Na "Dažynkach" aficyjny kiraŭnik paśla doŭhaj paŭzy vykazaŭsia na temu stasunkaŭ z Rasiejaj. Adčuvałasia ŭnutranaja kalizija. Z adnaho boku, nia chočacca dražnić husiej u Kramli. Razam z tym, iluzijaŭ niama, i treba psychalahična rychtavać elektarat da niepaźbiežnaj bitvy za haz.
Tamu Łukašenka choć i ŭznaharodziŭ dziažurnym kamplimentam novaha premjera Zubkova (maŭlaŭ, valavy čałaviek i piśmienny ekanamist), ale tut ža zaznačyŭ, što radykalnych źmien u dvuchbakovych dačynieńniach ad hetaha pryznačeńnia nie čakaje. Zrazumieła, u pytańniach vialikaj palityki Zubkoŭ tam vyrašaje naŭrad ci bolej, čym u nas Sidorski.
Nu a hazavaja tema spravakavała ŭsio ž žorstkija zajavy. Kštałtu toj, što "Hazprom" jaŭna nažyvajecca na našaj krainie". Maŭlaŭ, dachodnaść praktyčna takaja, jak pry pastaŭkach u Niamieččynu. "Naleta jany chočuć padniać canu jašče na 15-20%. To bok, dachodnaść u Biełarusi budzie dla Rasiei jašče vyšejšaj, čym u Niamieččynie. Ja nia viedaju, u čym my tak pravinilisia pierad kiraŭnictvam Rasiei", — dadaŭ biełaruski kiraŭnik.
Ekanamisty, musić, paspračajucca z raźlikami: usio ž 100 dalaraŭ dla nas i 240 dla niemcaŭ — roźnica vielmi vialikaja, tut na adnu tolki adlehłaść, na tak zvanaje "plačo" nia śpišaš. Ale chalera ź imi, ź ličbami! Zajava maje inšy — psychalahičny raźlik. Nie vypadkova ŭ paraŭnańni fihuruje mienavita taja kraina, u vajnie suprać jakoj niekali "razam hnili ŭ akopach". Zakranaje struny, asabliva ŭ starejšych.
Ale jak ni kruci, a niemcy płaciać spraŭna, i da ich pretenzij nijakich. Zatoje — vo dzie sapraŭdy histaryčnyja hrymasy! — realnaściu stali hazavyja vojny miž farmalnymi chaŭruśnikami.
Voś i zaraz užo čujucca dalokija hrymoty. Deklaravany namier na pieramovach z "Hazpromam" žorstka prytrymlivacca nacyjanalnych intaresaŭ. Chacia vynik čarhovaj kalizii nie vidavočny. Maksymum abiacanaha palahaje u tym, što "kantrakt my pastarajemsia paśpieć padpisać da boju kramloŭskich kurantaŭ". Niaŭžo budzie deža-viu?
Kamientary