Raskoł u EHU? Častka vykładčykaŭ choča alternatyvy Michajłavu
U Jeŭrapiejskim humanitarnym univiersitecie, jaki pracuje ŭ vyhnańni ŭ Vilni, stvorana płatforma «Za novy EHU».
Jak paviedamlajuć inicyjatary alternatyŭnaj płatformy, jana abjadnała tych, chto nie zhodny ź ciapierašnim kursam administracyi i choča «viarnuć prajektu EHU jaho pieršapačatkovy sens — efiektyŭnaha biełaruskaha humanitarnaha VNU ź jeŭrapiejskaj jakaściu adukacyi i navukovaj pracy».
Pavodle inicyjataraŭ płatformy, jaje ŭžo padtrymali 13 z 20 kandydataŭ u Sienat (hałoŭny orhan samakiravańnia univiersiteta), vybary ŭ jaki projduć 19 listapada. Siarod ich — prafiesar Pavieł Cieraškovič, dacenty Volha Šparaha, Andrej Łaŭruchin, Maksim Žbankoŭ.
«Pryčyna abjadnańnia akademičnaj supolnaści — hłyboki ŭnutrany kryzis, jaki pieražyvaje «ŭniviersitet u vyhnańni». Jaho abvastreńnie vyjaŭlajecca ŭ rastučaj prychilnaści kiraŭnictva EHU da aŭtarytarnaha stylu kiravańnia, u tym liku da nieprazrystaj kadravaj i finansavaj palityki, što stavić pad pahrozu isnavańnie ŭniviersiteta jak demakratyčnaha adukacyjnaha prajekta dla Biełarusi»,— havorycca ŭ zvarocie inicyjataraŭ novaj płatformy EHU.
Prarektar pa raźvićci i kamunikacyi EHU Daryjus Udrysa tak prakamientavaŭ situacyju:
«Zhadany dakumient źjaŭlajecca častkaj kampanii pa vybarach u novy Senat Eŭrapiejskaha humanitarnaha ŭniversytetu (EHU). U adpaviednaści sa Statutam universytetu, Senat adkazvaje za akademičny ŭzrovień ŭniversytetu.
Senat taksama pradstaŭleny ŭ Radzie kiraŭnikoŭ universytetu, dzie jon udzielničaje ŭ pryniaćci klučavych rašeńniaŭ.
Kiraŭnictva i administracyja EHU zaŭsiody padtrymlivali i praciahvajuć zaachvočvać kanstruktyŭnuju dyskusiju ab palapšeńni jakaści navučańnia i ŭmovaŭ pracy ŭ EHU, a taksama ab padtrymańni biełaruskaj identyčnaści ŭniversytetu.
Šerah idej, prapanavanych u dakumencie, užo realizujecca. Kiraŭnictva i administracyja EHU čakajuć kanstruktyŭnaha supracoŭnictva ź siabrami novaha Senatu.
Z adabreńnia Rady kiraŭnikoŭ, EHU prymaje šerah zachadaŭ, kab palepšyć jakaść akademičnych prahramaŭ i daśledavańniaŭ, a taksama palapšać umovy pracy dla našych vykładčykaŭ.
Jany ŭklučajuć u siabie značnaje pavieličeńnie biudžetu dla vykładčykaŭ, zamacavańnie vykładčyckaha składu ŭniversytetu na stałych pasadach razam z konkursnym pracesam pryjomu na hetyja pasady, vyraźniej sfarmulavanyja patrabavańni i bolš systematyčnyja acenki pracy.
EHU uśviedamlaje, što nia ŭsie vykładčyki pahodziacca z kožnym zachadam. Kiraŭnictva, administracyja, Senat i vykładčyki EHU padzialajuć adkaznaść za toje, kab naš universytet nadalej prapanoŭvaŭ biełaruskim studentam vysakajakasnuju alternatyvu tamu, što prapanujecca ŭ Biełarusi, i ŭnosiŭ svoj układ u pazytyŭnaje raźvićcio biełaruskaha hramadztva».
Miž tym Pavał Cieraškovič, prafesar departamentu historyi EHU, kiraŭnik Senatu, zajaviŭ: «Kryzis EHU šmat u čym źviazany z tym, što niestandartnyja prablemy niestandartnaha ŭniversytetu sprabujuć vyrašać standartnymi pryjomami, pašytymi pavodle šablonaŭ nealiberalnaha menedžmentu.
Akademičnaja supolnaść nie razhladajecca kiraŭnictvam EHU jak paŭnavartasny partner. Z kožnaj novaj redakcyjaj Statuta — universyteckaj kanstytucyi, jakaja biaskonca źmianiajecca — pravy Senatu i, adpaviedna, vykładčykaŭ i studentaŭ stanoviacca ŭsio bolš i bolš efemernymi».
Kamientary